پارتى چه‌ند باره‌گايێن خوه راده‌ستى هێزێن ئه‌منى كرن
ئه‌ڤرۆ نيوز، نيوار محه‌مه‌د سه‌ليم:
به‌رپرسێ لقێ 12 يێ پارتى ديموكراتى كوردستان راگه‌هاند كو سێ ژ باره‌گايێن پارتى راده‌ستى هێزێن ئه‌منى كرن هه‌تا كو خوونا چو كه‌سه‌كى نه‌هێته رێتن و دده‌ته زانين ژى كو ئه‌و كه‌سێن ڤى كارى دكه‌ن زێده‌تر ژ لايێ بزاڤا گۆڕان ڤه دهێنه پالدان، به‌لێ ئێكه‌تى ژى د ناڤ دانه.
فازل به‌شاره‌تى، به‌رپرسێ لقێ 12 يێ پارتى ديموكراتى كوردستان بۆ ئه‌ڤرۆ نيوز گۆت: “جاره‌كا دى ل گه‌ل خرڤه‌بوونێن وه‌لاتيان وه‌كو نه‌رازيبوون به‌رامبه‌ر مووچه‌ى، جاره‌كا دى هێرش كره سه‌ر باره‌گايێن پارتى و ل قه‌زا سه‌يدسادق ب به‌ران هێرش كره سه‌ر باره‌گايێ پارتى ديموكراتى كوردستان”.
به‌شاره‌تى زێده‌تر گۆت: “مه وه‌كو پارتى ديموكراتى كوردستان نه‌ڤێت خوينا چو كه‌سه‌كى بهێته رێتن، چونكو پاراستنا خوينا هه‌ر تاكه‌كێ كورد ئارمانجا مه‌يه، ژ به‌ر هندێ ژى مه باش زانى جاره‌كا دى ئه‌وان باره‌گايێن خوه راده‌ستى هێزێن ئه‌منى يێن ناڤخۆى بكه‌ين”.
پێشتر ژى ل گه‌ل هێرشێن هه‌يڤا 10 يێن خونيشانده‌ران ئه‌وێن ژ لايێ گۆڕان ڤه هاتينه پالدان، پارتى ديموكراتى كوردستان ل پارێزگه‌هێن سلێمانيێ و هه‌له‌بچه باره‌گايێن خوه راده‌ستى هێزێن ئه‌منى كربوون”.
ئاماژه ب وێ چه‌ندێ ژى كر كو ل ناڤ هه‌له‌بچه ئه‌و كێشه نينه و باژێرێ هه‌له‌بچه يێ جودايه ژ هه‌موو وان باژێرێن دى يێن وێ ده‌ڤه‌رێ و يێ ئارامه و چو كێشه تێدا نينن.
به‌رپرسێ لقێ 12 يێ پارتى ئاماژه ب وێ چه‌ندێ ژى كر كو نوكه ژى دا كو كێشه مه‌زنتر لێ نه‌هێن ل سێ ده‌ڤه‌ران پارتى ديموكراتى كوردستان باره‌گايێن خوه راده‌ستى هێزێن ئه‌منى كرينه و ب تايبه‌ت ژى ل سه‌يد سادق و پێنجوين ئه‌ڤ مه‌ترسيه هه‌يه.
نه‌ڤه‌شارت ژى كو ل هه‌ر جهێ پشته‌ڤان و حه‌زژێكه‌رێن بزاڤا گۆڕان لێ بن ل وێ ده‌ڤه‌رێ باره‌گايێن پارتى زێده‌تر ل بن مه‌ترسيێ نه، چونكو ئه‌و ب ره‌نگه‌كێ پلان دارێتى ڤى كارى ئه‌نجام دده‌ن و “گۆڕان ب ڤى ره‌نگى دژاتيا پارتى دكه‌ت”، دا زانين ژى كو كه‌سانێن ناڤ ئێكه‌تيێ ژى يێن ل گه‌ل هه‌ين، “به‌لێ ئه‌و نه سياسه‌تا حزبێ يه ب تنێ چه‌ند كه‌سه‌كێن ناڤ ئێكه‌تيێ ڤێ رێخۆشكرنێ دكه‌ن”.
