پارتى: گۆڕان بۆ چنينا مه‌ره‌مێن سياسى به‌رده‌واميێ ب خۆنيشاندانان دده‌ت
ئه‌ڤرۆ نيوز:
جڤاتا سه‌ركرداتيا (سلێمانى- هه‌له‌بچه) يا پارتى ديموكراتى كوردستان راگه‌هاند كو بزاڤا گۆڕان درێژيێ ب خۆنيشاندانان دده‌ت بۆ به‌رژه‌وه‌نديێن سياسى و حزبى يێن خوه، ئه‌ڤه ژى زيانێ ب داخوازيێن ره‌وا يێن خه‌لكى دگه‌هينيت.
جڤاتا سه‌ركرداتيا (سلێمانى- هه‌له‌بچه) يا پارتى ديموكراتى كوردستان د راگه‌هاندنه‌كێ دا كو وێنه‌ك بۆ ئه‌ڤرۆ نيوز ره‌وانه‌كريه، دبێژيت: “رێپيڤان و خۆنيشاندانێن ئارام، ئێكن ژ سيمايێن كۆمه‌لگه‌ها مه‌ده‌نى و ئێكه ژ پره‌نسيپێن ديموكراسيه‌تێ، د ڤى لايى دا ئه‌م وه‌كو جڤاتا سه‌ركرداتيا (سلێمانى- هه‌له‌بچه) يا پارتى ديموكراتى كوردستان وه‌كو چاوان هه‌رده‌م پشته‌ڤانيا ته‌مام يا داخۆازيێن ره‌وا يێن فه‌رمانبه‌ر و مامۆستايان بووينه، نوكه ژى هيڤى خوازين حوكمه‌تا هه‌رێما كوردستانێ ميكانيزمه‌كا گۆنجاى بۆ چاره‌كرنا كاودانێن ژيانا مووچه‌خۆڕان بگريته به‌ر و چاڤه‌كى ب ژيانا ره‌وش و مافێن دارايى يێن مووچه‌خۆڕان دا بكێشيت”.
راگه‌هاندنێ هه‌ڤده‌م رۆناهى خستيه سه‌ر به‌رژه‌وه‌نديا سياسى يا لايه‌نه‌كێ دياركرى و دبێژيت: “خه‌لكێ خۆراگرێ باژێرێ سلێمانيێ و لايه‌نێن سياسى ئاگه‌هدار دكه‌ين كو (بزاڤا گۆڕان) ب ناڤێ نه‌رازيبوونا خه‌لكى ل ژێر دوريشم و داخوازيێن ره‌وا يێن خه‌لكى دا ب مه‌ره‌ما چنينا مه‌ره‌مێن سياسى، درێژه‌پێدان ب خۆنيشاندانان دده‌ت بۆ به‌رژه‌وه‌نديا سياسى و حزبى يا خوه، دياره ته‌وزيفكرنا ئه‌جنيدا سياسى ژى ل ناڤه‌ندا داخوازيا ره‌وايا خه‌لكى زيانێ ب داخوازيێن ره‌وا يێن خه‌لكى دگه‌هينيت و سيمايێ پێكڤه‌ژيان و ئاشتيێ تێك دده‌ت و لێكه‌فتنێن خراب ل سه‌ر ره‌وشا سياسى يا باژێرى بحهـ دهێليت و زيانا ب هه‌موو لايه‌كى دگه‌هينيت”.
د دووماهيا راگه‌هاندنێ ژى دا داخواز ژ ده‌زگه‌هێن ئه‌منى كريه كو هێمنيا باژێرى و سلامه‌تيا وه‌لاتى و خۆنيشانده‌ران ب پارێزن.