پارتى: ھێلێن سۆر ل سەر چو پرسەکێ مە نینن
ئەڤرۆ:
ئەندامەکێ مەکتەبا سیاسی یا پارتی دیموکراتی کوردستان راگەھاند، مە پێدڤی ب سەرۆک بارزانی یا ھەی، چونکی ئەو دەمەکێ دوور و درێژە دناڤ سیاسەتێ دا و پەیوەندیێن بەرفرەە یێن ل گەل جیھانا دەرڤە یێن ھەین، لەوما بۆ ڤێ قۆناغێ مە پێدڤی ب سەرۆکەکێ وەکو مەسعود بارزانی یا ھەی.
کاکەمین نەجار ئەندامێ مەکتەبا سیاسی یا پارتی بۆ مالپەرێ فەرمیێ پارتی گوت” پرسا سەرۆکاتیا ھەرێمێ بوویە بابەتەکێ گەرم ل کو دێ ٢٠ تەباخێ دەمێ سەرۆکاتیا ھەرێمێ دێ ب دووماھی ھێت و ل دووڤ قانوونا سەرۆکاتیا ھەرێمێ دڤێت بەری دو مەھان ژ دووماھی ھاتنا دەمێ سەرۆکاتیێ، سەرۆکیچ ھەرێمێ داخوازا ھەلبژارتنان ژ پەرلەمانی بکەت، سەرۆکێ ھەرێمێ ئەڤ چەندە کر، لێ ئایا پەرلەمان و کۆمسیۆنا ھەلبژارتنان ل کوردستانێ دێ شێن ھەلبژارتنان کەن؟ کۆمسیۆنێ یا راگەھاندی کو نەشێت ھەلبژارتنان بکەت ژ بەر پێدڤی ب بودجەکێ مەزنە و کارمەند ژی نینن، لەوما دەمێ نەشێت ھەلبژارتنان بکەت، پێدڤیە حزبێن سیاسی سازانا سیاسی بکەنە د بەنامەی دا و ل پەرلەمانی قانوونێ راستڤەکەن و ڤێ پرسێ چارە بکەن”.
کاکەمینی زێدەتر گوت” مە پێدڤی یا ب سەرۆک بارزانی ھەی، چونکی ئەو دەمەکێ دوور و درێژە دناڤ سیاسەتێ دا و پەیوەندیێن بەرفرەە ل گەل جیھانا دەرڤە یێن ھەین ودناڤ کوردستانێ ژی دا شارەزاییەکا باش یا ھەی، ژیانا خوە ل پیناڤی کوردستانێ یا بەخشکری، ل وی دەمێ شەڕێ داعشێ دەستپێکری کو قەیران و کێشێن زۆر مە یێن ھەین و کوردستان یا د قۆناغەکا ڤەگوھاستنێ دا و بارودۆخێ بەغدا یێ خرابە و شەڕێ داعشێ یێ ھەی، ئەو ھەموو کێشە مە یێن ھەین، لەوما ئەڤرۆ مە پێدڤی ب سەرۆکەکێ وەکو مەسعود بارزانی یا ھەی”.
دیسا گوت” ھەکە ھەلبژارتن بھێنە کرن، سەرۆک بازرانی دێ بەربژارێ پارتی بیت و ھەموو کەسەک یێ ئازادە خوە ب ھەلبژێریت کو مەرجێن قانوونی ل دەڤ ھەبن، ھەتا نوکە چو حزبەکێ رانەگەھاندیە کو وان بەربژار یێ ھەی، بەلێ ھەکە ھەلبژارتن ھاتنە ئەنجامدان، بێگومان دێ ھەڤرکی ھەبیت و ھەر کەسێ خوە بھەلبژێریت یێ ئازادە و بلا خوە ب ھەلبژێریت”.
ل دۆر ب دووماھی ھاتنا دەمێ قانوونیێ سەرۆکێ ھەرێما کوردستانێ، ڤی ئەندامێ مەکتەبا سیاسی یا پارتی گوت” پێشنیارا پارتی ئەوە، ل گەل حزبێن سیاسی و پەرلەمانی روونیت و بگەھینە رێککەفتنێ، پێشنیارا پارتی ئەوە کو نە ب تنێ دشێین سەرۆکێ ھەرێمێ بدانین و نە ب تنێ بریارێ ژی ددەین و نە مە ھێلا سۆر ژی ل سەر چو پرسەکی نینە، لەوما پێدڤیە دانوستاندنێ بکەین و ئەوا د بەرژەوەندا گشتی دا بیت، مە ئەو پێ باشە”.
