پارتی بزاڤەکا دیتر بۆ پەسەندكرنا پرۆژێ چاكسازیێ دەست پێ كر
ئەڤرۆ نیوز ، زنار تۆڤی :
ئەندامەکا پەرلەمانێ كوردستانێ دیار کریە،کو چەند حزب و کەسان دڤێن قانوونا چاكسازیا خانەنشینیێ نەهێته پەسەند کرن، بۆ هندێ کو بەرژەوەندیێن وان نەفەوتن،لەوما نوکە بزاڤەکا دیتر بۆ پەسەندكرنا وی پرۆژە قانوونێ ب زۆرینە دەست پێ كریە.
ئامینا زكری ئەنداما پەرلەمانێ كوردستانێ ل سەر لیستا پارتی دایە خویاکرن،کو هەموو بزاڤێن بەری نوکە د بێ ئەنجام بوون بۆ تێپەراندنا پرۆژە قانوونا چاكسازیێ د مووچەی و ئیمتیازێن خانەنشینیێ، ئەو ژی ژبەر چەند كەس و حزبان بوو،کو كەفتبوونە بەرگریكرنێ ژ بەرژەوەندیێن خوە یێن تایبەت.
هەروەسا گوتیە، پارتی بزاڤەکا دیتر ل پەرلەمانی دەست پێ كریە بۆ هندێ کو روونشتنا پەرلەمانی بهێتە کرن و ئەو پرۆژە قانوونە تێپەریت.
ئامینایێ دیارکر ژی،بزاڤ د بەردەوامن بۆ هندێ کو بەری هەلبژارتنێن عێراقێ ئەو قانوونە بهێتە پەسەند کرن و پەرلەمانێ كوردستانێ و پەرلەمانتار ژی ب ئەركێ خوو راببن،کو ئەركەکێ قانوونیە.
ل دوماهیا سالا بوری حوکمەتا هەرێما كوردستانێ پرۆژە قانوونەکا چاكسازیێ ئاراستەی پەرلەمانێ كوردستانێ كربوو،لێ پشتی پەسەندكرنێ ب ئەگەرێ نەرازیبوونا جادێ جارەکا دیتر ئەو پرۆژە ڤەگەراندیە پەرلەمانی.