پارتی به‌رسڤا سەعدی ئه‌حمه‌د پیرە دده‌ت
ئه‌ڤرۆنيوز:
په‌يڤدارێ پارتى ديموكراتى كوردستان ل به‌رامبه‌ر داخۆيانه‌يكا په‌يڤدارێ ئێكه‌تى نيشتمانى كوردستان كو راگه‌هاندبوو” پارتى پۆستێن سه‌رۆك وجێگرێ داواكارێ گشتيێ هه‌رێما كوردستانێ ل سه‌ر خوه به‌لاڤكرينه” هاته ده‌نگ وراگه‌هاند “هه‌ر كاره‌كێ هاتبيته كرن ل دووڤ قانوونێ بوويه”.
پشتى سه‌عدى ئه‌حمه‌د پيره، په‌يڤدارێ ئێكه‌تيێ ب ده‌زگه‌هه‌كێ راگه‌هاندنێ يێ نێزيك ژ باله‌كێ حزبا خوه راگه‌هاندى كو پارتى پۆستێن سه‌رۆك وجێگرێ داواكارێ گشتيێ هه‌رێما كوردستانێ ل سه‌ر به‌لاڤكرينه وئه‌و چه‌نده ژى جهێ قه‌بوولكرنێ نينه، مه‌حموود محه‌مه‌د په‌يڤدارێ پارتى ديموكراتى كوردستان دداخۆيانيه‌كا رۆژنامه‌ڤانى دا گۆت” ل دۆر پۆستێ داواكارێ گشتى، پشتى كو دادوه‌ر عه‌لى ناجى هاتيه خانه‌نشينكرن، دادوه‌ر جه‌واد ب وه‌كاله‌ت ئه‌و پۆسته ب رێڤه‌بريه، به‌لێ ئه‌و گوهۆرينه ل ڤێ دووماهيێ هاتيه كرن، ل سه‌ر به‌ربژارێ حزبى نه‌بوو، به‌لكو ل دووڤ پێرابوونێن قانوونى بوو”.
په‌يڤدارێ پارتى گۆت ژى” پركرن يان گوهۆرين يا ل دووڤ پێرابوونێن قانوونى وئيدارى هايته كر نه‌كو پارتى ل سه‌ر خوه به‌لاڤ كريه”.
ئاشكراكر ژى” پۆستێ سه‌رۆك وجێگرێ داواكارێ گشتيێ هه‌ولێرێ، پرسه‌كا دى يه وهه‌ڤشێوێ پرسا سه‌رۆك وجێگرێ داواكارێ گشتيێ پارێزگه‌ها سلێمانيێ يه، هه‌ر ژكه‌ڤندا چاوان ل سلێمانيێ هاتيه ب رێڤه‌برن، ل هه‌ولێرێ ژى هه‌ر وه‌سايه وده‌ستكارى نه‌هاتيه كرن، به‌لێ ئه‌وا هه‌ريما كوردستانێ، ئه‌و دادوه‌رێن دهێنه دانان، ئه‌زموون پێ دهيته كرن ول دووڤ پێرابوونێن قانوونى كو بۆ وان هاتينه دانان”.
گۆت ژى” وه‌كو پارتى، مه چو به‌ربژاره‌ك نه‌بوو بۆ وێ چه‌ندێ كه‌سه‌كى بكه‌ينه سه‌رۆكێ وێ فره‌مانگه‌هێ”.
ل دۆر وێ ئاخڤتنا سه‌عدى ئه‌حمه‌د پيره‌ى كو گۆتبوو” ئه‌ڤ كارێ پارتى جهێ قه‌بوولكرنێ نينه ودڤێت ل گه‌ل پارتى به‌حسێ ڤى بابه‌تى بكه‌ين”. مه‌حموود محه‌مه‌د په‌يڤدارێ پارتى گۆت” نزانم مه‌ره‌ما وى ژ جهێ قه‌بوولكرنێ نينه. چيه؟ ئه‌و بخوه دشێت وێ چه‌ندێ رۆهن بكه‌ت كا مه‌ره‌ما وى ژ قه‌بوول ناكه‌ت چيه.. ل گه‌ل وێ چه‌ندێ دشياندايه دكۆمبوونه‌كێ دا به‌حسێ ڤى بابه‌تى بهێته كرن وه‌كو گه‌له‌ك تشتێن دى وئه‌ڤه بابه‌ته‌كێ گه‌له‌ك ئاسايى يه”.
