پارتی بۆ پێکئینانا حوکمەتێ دێ سەرەدانا ئالیێن سیاسی کەت
ئه‌ڤرۆ نيوز:
شیرەتکارێ مەکتەبا سیاسیا پارتی دیموکراتی کوردستان ئاشکراکر، بڕیارە پارتی سەرەدانا ھەموو لایەنێن سیاسی بکەت بۆ وەرگرتنا بۆچوونا وان لدۆر پێک ئینانا کابینا نوویا حوکمەتا ھەرێما کوردستانێ و دبێژیت، ئەز دگەل ھەبوونا ھێزێن ئۆپۆزسیۆنم دناڤا پەرلەمانی دا ھەتا چاڤدێریا کارێن حوکمەتێ بکەن.
عارف رۆشدی، شیرەتکارێ مەکتەبا سیاسیا پارتی دیموکراتی کوردستان بۆ رۆژناما ئەڤرۆ گۆت” پارتی وەک حزبەکا بەرپرسیار بەردەوام دخوازیت دگەل ھەموو لایەنێن سیاسی یێن ھەرێما کوردستانێ لێک تێگەھشتن ھەبیت و زەمینەسازی ھەبیت، ھەتا ھەموو لایەنێن سیاسی گورەی قەبارێ خوە رۆلھەبیت ل پڕۆسا سیاسیا ھەرێما کوردستانێ دا، نوکەژی پشتی راگەھاندنا ئەنجامێن دوماھیێ یێن ھەلبژارتنێن پەرلەمانێ کوردستانێ پارتی دیموکراتی کوردستان لبەرە دەست ب سەرەدانا خوە بۆ ھەموو لایەنێن سیاسی بکەت، ھەر لایەنەکێ کۆرسی بدەستڤە ئینابن شاندێ دانوستانکارێ پارتی دێ سەرەدانا ئەڤی لایەنی کەت، مەرەمژی ل سەرەدانێن پارتی ئەڤە حوکمەتەکاب ھێز و ئەکتیف لھەرێما کوردستانێ بھێتە دامەزراندن.
عارف رۆشدی دیارکر، ب دیتامن و ئەز بخوە ل گەل ڤێ چەندێ مە ئۆپۆزسیۆن ل پەرلەمانێ کوردستانێ دا ھەبیت د خۆلا پێنجێ، بەلێ ئۆپۆزسیۆنەکا کارا و نیشتیمانی بیت، ھەتا بشێت چاڤدێریا کارێن حوکمەتا ھەرێما کوردستانێ بکەت، چونکە نە مەرجە ھەموو ھێزێن کۆرسیان بدەستڤە دئینن بچنە ناڤا پێکھاتا حوکمەتێ دا، سیستەمێ دیموکراتیێ وەسایە ھنجەک حزب دێ بەرنامەکی داڕێژن بۆ ئاڤاکرنا حوکمەتێ و یێن دیژی وەک ھەڤڕک دێ مینن چاڤدێریا کاروبارێن حوکمەتێ بکەن و پشکداریێ د دەرکرنا پڕۆژە قانوونێن باشدا بکەن، رامان ئەڤە نینە دەمێ ھێزەک بڕیارێ ددەت ببیتە ئۆپۆزسیۆن بۆچوونا ئەڤێ حزبێ ناھێتە وەرگرتن بۆ پڕۆسا دیموکراسیێ و پێشڤەچوونا دیموکراتیێ د وەلاتێ مەدا ئەز بخوە دگەل ھەبوونا ئۆپۆزسیۆنێ مە ل ھەرێما کوردستانێ.
ل دۆر پەیوەندیێن ناڤبەرا بەغدا و ھەرێما کوردستانێ عارف رۆشدی گۆت: ئەف پێشنیارێن پارتی ھەی بۆ حوکمەتا داھاتیا عیراقێ و چاوانیا پشکداریا پارتی لسەر بنەمایێ تەوافووق و شەراکەتا حەقیقیە، چونکە ئەڤە دبیتە ئەگەرەک بۆ چارەسەرکرنا ئاریشەیێن نوکە عیراق تێدا دەرباز دبیت، زەمینا لێک تێگەھشتنێ د ناڤبەرا ھەرێما کوردستانێ و بەغدا دێ باشتر کەت، ئەف پێشنیار و بەرنامێ پارتی ھەی بۆ پڕۆسا سیاسیا عیراقێ و پشکداریکرن د کابینا عادل عەبدولمەھدی تنێ بۆ پارتی نینە، بەلکو بۆ ھەموو عیراقێ نە و دێ بڤێ چەندێ پرسێن ھەلاویستی بھێنە چارەسەرکرن.
