پارتی: داخوازا گۆڕان ژپەرلەمانێ عیراقێ سەرناگڕیت
ئه‌ڤرۆ نيوز:
بزاڤا گۆڕان بڕیارەک لپەرلەمانێ عێراقێ بەرھەڤکریە بۆ کاراکرنا پەرلەمانێ کوردستانێ، دخوازن پەرلەمانتارێن عێراقێ ژی بۆ ڤێ مەرەمێ پشتەڤانیا وان بکەن، فڕاکسیۆنا پارتی تەکەز دکەت، ب چو شێوەکی رێکێ نادەن و فڕاکسیۆنا پارتی ل ھەردوو پەرلەمانێن عێراق و ھەرێما کوردستانێ ب توندی بەرسیڤا فڕاکسیۆنا گۆڕاندایە و ئەو یەک پشتڕاستکریە رێکێ نادەن چو بڕیار ژلایێ عێراقێ بسەر ھەرێما کوردستانێ دا بھێنە سەپاندن.
نوونەرەکێ کورد لپەرلەمانێ عێراقێ ئاماژە بوێ چەندێ دکەت، کو بزاڤێن گۆڕان ل پەرلەمانێ عێراقێ بۆ دەرکرنا بڕیارەکێ لدۆر راگرتنا کارێن پەرلەمانێ کوردستانێ شکست ئینایە و دبێژیت، دکتۆر سەلیم جبوری و ھژمارەکا بەرچاڤا پەرلەمانتارێن عەرەب ژی دژی بڕیارا بزاڤا گۆڕان راوەستیاینە.
سیروان سیرینی، پەرلەمانتارێ فڕاکسیۆنا پارتی دیموکراتی کوردستان لپەرلەمانێ عێراقێ بۆ رۆژناما ئەڤرۆ گۆت” بزاڤا گۆڕان دخوازیت ئاریشەیێن پەرلەمانێ کوردستانێ ڤەگوھێزیت بۆ ناف پەرلەمانێ عێراقێ و ئەڤێ چەندێ ژی پتر بزاڤا گۆڕان نەشیرین کریە ل بەغدا، ب دیتنامن ئەڤ پێنگاڤا پەرلەمانتارێن بزاڤا گۆڕان بێڕێزیە ھەمبەر دەستکەفتێن خوینا شەھیدا، ژبەرکو حوکمەتا عێراقێ و یا ھەرێما کوردستانێ دشێن بڕیارێن پەرلەمانێ عێراقێ جێ بەجێ نەکەن، ھەتا بەری سالا بۆری ئاریشەیەک مە وەکی لیژنا پەروەردە ھەبو لدۆر کەرتێ پەروەردێ و پەرلەمانی بڕیاردا، بەلێ حوکمەتێ بجە نەئینا دەمێ ئەم چووینە دادگەھا فیدڕاڵ وەک لیژنە و مە سکالا تۆمارکری، دادگەھێ ئەفچەندە بمە راگەھاند، کو مەرج نینە حوکمەت یا پێگیری بڕیارێن پەرلەمانی بیت، لەوڕا زۆرجارا پەرلەمانێ عێراقێ بڕیاردەرکرینە و دەزگەھێ جێ بەجێکار واتە حوکمەتێ پێگیری ب بڕیارا پەرلەمانی نەکریە، ژلایەکێ دیڤە ھەرێما کوردستانێ پەرلەمانێ خوە ھەیە و پابەندی بڕیارێن پەرلەمانێ عێراقێ نابیت.
سیروان سیرینی گۆتژی” سەرۆکێ فڕاکسیۆنا گۆڕان د کۆمبوونا بۆری یا پەرلەمانێ عێراقێ دا دخواست ئەڤێ بڕیارێ بخوینیت، بەلێ ژلایێ دکتۆر سەلیم جبوری سەرۆکێ پەرلەمانی رێگری لێھاتەکرن و رێکنەدا بڕیار بھێتە خواندن، ھەروەسا پەرلەمانتارێن عەرەبژی رۆل ھەبو ئەفچەندە ب سەرۆکێ فڕاکسیۆنا گۆڕان گۆت، کو ئەو ناخوازن دەستوەردانێ دناف کاروبارێن ھەرێما کوردستانێ دا بکەن و دوڤ رێگەیەکێ دگەڕن ھەتا لایەنێن سیاسی لھەرێما کوردستانێ بگەھنە رێکەفتنێ بۆ چارەسەرکرنا ئاریشەیێن ناڤبەرا خوە، ژبەر ڤان خالێن من ئیماژە بۆکری ئەڤێ بزاڤا گۆڕان لپەرلەمانێ عێراقێ شکەستن ئینا و پتر نەشیرینکرن، ھەر بزاڤەکا بڤی شێوەیژی سەرناگریت و ئەم رێکێ نادەین ب چو شێوەیەکی پەرلەمانێ عێراقێ لدۆر ئاریشەیێن نافخۆیێن ھەرێما کوردستانێ چو بڕیارا بدەت و مایتێکرنێ د کاروبارێن ھەرێما کوردستانێ دا بکەت، ھەر پێنگاڤەکا بڤی شێوەیژی دێ بیتە ئەگەرێ پتر دوورکەفتا لایەنێن سیاسی و ئینانا دەستێ عێراقێ بۆناف ئاریشەیێن نافخۆیی یا سەرکەفتی نابیت.
