پارتی دێ پۆستێ جێگرێ سەرۆک وەزیرێن عیراقێ وەرگریت
ئه‌ڤرۆ نيوز:
سەرۆکا فڕاکسیۆنا پارتی لپەرلەمانێ عیراقێ ئاشکراکر، پارتی ل حوکمەتا نوویا عیراقێ دێ چەندین پۆستێن گرنگ وەربگریت ژوانا جێگرێ سەرۆک وەزیران و وەزارەتێن سیاسی و خزمەتگوزاری دیارکر، پارتی زێدەتر گرنگیێ ب بەرنامێ حوکمەتا نوویا عیراقێ ددەت نەک وەرگرتنا پۆستان.
دکتۆر ڤیان سەبری، سەرۆکا فڕاکسیۆنا پارتی ل پەرلەمانێ عیراقێ بۆ رۆژناما ئەڤرۆ گۆت” پارتی دیموکراتی کوردستان دێ بھێزڤە پشکداری د کابینا نوویا حوکمەتا عیراقێ دا کەت و پێگە و رۆل دێ ھەبیت، چونکە پارتی ل سەر ئاستێ ھەرێما کوردستانێ و عیراقێ ل ھەلبژارتنێن 12ی ئایاری بۆری دا ھێزا ئێکێ دەرکەفت، بێشک گورەی ئەنجامێن ھەلبژارتنێن بۆری دێ چەندین پۆست بەر پارتی کەڤن ل حوکمەتا عیراقێ، ھەروەسا دێ پۆستێ جێگرێ سەرۆک وەزیرێن عیراقێ بەھرا پارتی بیت، ب دیتنامە وەک پارتی زێدەتر بەرنامێ حوکمەتێ گرنگە، بتایبەتی پارتی تەکەزیێ ل سەر شەراکەتا راستەقینە و بەھرا ھەرێما کوردستانێ ل بودجێ گشتیێ عیراقێ و بجە ئینانا دستووری دکەت، چونکە نابیت ھەرێما کوردستانێ بھێتە بێ بەھرکرن ل مافێن خوە یێن قانوونی و دستووری، دانوستان ل سەر پشکداریا پارتی د حوکمەتا نوویا عیراقێ ل سەر ئاستێن بلند بەردەوامی ھەیە، مە چەندین پرسێن ھەلاویستی ھەنە ل گەل بەغدا و ب وەرگرتنا ھندەک وەزارەتان دێ ئەف ئاریشە ھێنە ئێکلاکرن، واتە ھەکە پارتی ھندەک وەزارەتان وەرگریت د بەرژەوەندیا ھەرێما کوردستانێ و یا عیراقێ ژی دایە، ژبەرکو پارتی دێ وەک ھەڤی ئەڤان وەزارەتان برێڤەبەت.
ل دۆر ئەنجامدانا رێککەفتنا دووماھیێ د ناڤبەرا پارتی و عادل عەبدولمەھدی دکتۆر ڤیان سەبری گۆت: ئەز نەشێم بێژم نەگەھشتینە رێکەفتنا دوماھیێ، بەلێ ھێشتا چەند رۆژەک ماینە بۆ راگەیاندنا کابینا نوویا عادل عەبدولمەھدی، ئەف پۆستێن بەھرا پارتی و داخوازیێن پارتی پێشکەشی بەربژێرێ راسپاردی بۆ پێک ئینانا حوکمەتا عیراقێ ھاتینەکرن، چونکە مە دڤێت ب وەرگرتنا ھندەک وەزارەت و پۆستێن گرنگ بالانسی رابگرین و دووماھیێ ب چەندین پرسێن گرێدایی ھەردو حوکمەتێن ھەرێما کوردستانێ و عیراقێ بینین، وەرگرتنا ئەڤان پۆستان گرنگیا خوە ھەیە بۆ ھەرێما کوردستانێ و موکڕبوونا پارتیژی مەرەمێ ژێ ئەڤە ئاریشە نەمینن و پشکداریا حەقیقی ھەبیت د حوکمەتێ دا.