پارتی: میلیشێن شیعی و داعش بۆمە کوردان وەکو ئێکن
ئەڤرۆ نیوز:
بەرپرسێ لقا پارتی دیموکراتی کوردستان ل قەزا خانەقینێ دیارکر، ژلایێ ئەمنی ڤە ڕەوشا خانەقین و دەوروبەران گەلەک یا خرابە و ڕۆژانە وەلاتیێن کورد ژلایێ میلیشیێن شیعی و چەکدارێن داعشێ دبنە ئارمانج، ھەروەسا گوت، ڕوبەرەکێ مەزن ژ ئاخا کوردستانێ دبن کۆنتڕۆلا چەکدارێن داعشێ دایە و ژبەر مەترسیا میلیشیێن شیعی، کورد نەچاربووینە کا چاوان خەندەکێ د ناڤبەرا خوە و داعشێ لێدەن، ب ھەمان شێوە د ناڤبەرا پێشمەرگە و حەشد شەعبی دا خەندەک یا ھاتیە لێدان.
جەعفەر شێخ مستەفا، بەرپرسێ لقا 15 یا پارتی دیموکراتی کوردستان ل خانەقینێ بۆ رۆژناما ئەڤرۆ گۆت” ژلایێ ئەمنی ڤە ڕەوشا قەزا خانەقینیچ و دەوروبەران گەلەک یا خراپە و ئەو چەندا ل دۆر وێ دھێـتە بەلاڤکرن ژی یا وەسانینە، ژ بەر کو بەری چەند ڕۆژان سێ شوفێرێن کورد ژخەلکێ خانەقینێ ھاتبوونە ڕەڤاندن و بەری دو ڕۆژان شیابوون خوە رزگاربکەن و ڤەگەڕن بۆ مالێن خوە، میلیشێن شیعی و ھێزا بەدر و داعش ھەموو بۆمە کوردان وەکو ئێکن و تیرۆرستن و ڕێ ل خەلکێ کورد دگرن و دکوژن و زۆریێ ل وەلاتیێن کورد دکەن، ل حەفتیا بۆری چار وەلاتیێن قەزا کەلارێ چۆبوونە دەوروبەرێن کەلار ب مەرەما ب دەستڤەئینانا جۆرە گیایەکی، ژلایێ چەکدارێن داعشێ ڤە ھاتبوونە ڕەڤاندن و ل ڕۆژا ددوڤدا کەسوکارێن وان چۆبوون بۆ دیتنا وان چار وەلاتیان، بەلێ مینەک بۆ ھاتبوو دانان و د ئەنجامدا سێ کەس شەھید بوون و سێ کەس ژی برینداربوون، نوکە چەکدارێن داعش ل نێزیکی دەڤەرێ ب ماتۆرسکلان ھاتنوچوونێ دکەن و وەلاتیێن کورد دکەنە ئارمانج، ب شێوەکێ گشتی ڕەوشا قەزا خانەقینێ و ناحی و گوندێن وێ گەلەک یا باش نینە”.
جەعفەری گۆت ژی” ھەتا نوکە 1500 مالێن ئاوارەبوین یێن ڤەگەڕیان بۆ ناڤ سەنتەرێ ناحیا جەلەولا، مخابن ڕەوشا جەلەولا گەلەک یا خرابە و شەڕ د ناڤبەرا ڕێڤەبەرێ ناحیێ و ھێزەکا وەزارەتا پێشمەرگە چێبوویە و بریندار ھەنە و نوکە پێشمەرگە تێدانە، ل ناحیا سەعدیە ژی میلیشێن شیعی و لەشکرێ عیراقێ تێدایە، ئەم نەچاربووینە خەندەکێ دناڤبەرا ھەردو ناحیان دا لێدەین، ئەوژی ھەتا میلیشیێن شیعی دەرباز نەبن، ھەکە ئەم بێژین مە دۆستایەتی ل گەل شیعان یا ھەی، بەلێ ھەر پێشمەرگەک بچیتە سنورێ وان، تەقێ لێ دکەن، بەلێ ھەکە ئەو دھێنە دناڤ خانەقینێ دا، چو ئاریشە نینە، نوکە تیرۆرستێن داعشێ ل دەڤەرێن کوردی ماینە و حەوزا حەمرین بۆ قەرەتەپە و ھەتا نێزیکی جەلەولا داعش تێدایە و ڕووبەرەکێ مەزن یا ئاخا کوردان دبن کۆنتڕۆلا داعشێ دایە و ب درێژیا پتری سەد کیلۆمەتران ھێشتا نەھاتیە ئازادکرن”.
