پارتی هێلا سۆر نینە بەلێ دڤێت ئالییێن دی ژی قەبارەیێ خوە بزانن
بەرپرسێ مەكتەبا رێكخستنا سلێمانیێ – هەلەبجە یا پارتی دیموكراتی كوردستان راگەهاند كو پارتی بۆ دانوستاندنێن پێكئینانا كابینەیا نوو یا حوكمەتا هەرێما كوردستانێ هێلا سور ل سەر هیچ ئالییەكی نینە، بەلێ ب وی مەرجی هەر ئالییەك قەبارەیێ خوە بزانیت.
عەلی حسێن، بەرپرسێ مەكتەبا رێكخستنا سلێمانیێ – هەلەبجە یا پارتی دیموكراتی كوردستان د كۆنگرەیەكێ رۆژنامەڤانیدا گۆت» هەرچەندە رێژەیا پشكداریكرنێ د هەلبژارتنێن پەرلەمانێ كوردستانێ ل پارێزگەهەكێ بۆ پارێزگەهەكا دی جوداهی هەبوو، بەلێ ب شێوەیەكێ گشتی رێژیەیا دەنگدانێ یا بلند و گەلەك باشبوو».
هەڤدەم گۆت ژی» هەلبژارتنێن ڤێچارێ یێن پەرلەمانێ كوردستانێ ب شێوەیەكێ دیموكراسییانە هاتنە ئەنجامدان و سەنگێ هەر ئالییەكێ تێدا دیاربوو».
عەلی حسێن گۆت ژی» ل هەردو پارێزگەهێن سلێمانیێ و هەلەبجە دەنگێن پارتی ب رێژەیەكا بەرچاڤ زێدەكرن».
ئەوژی گۆت» تنێ دەنگێن پارتی دیموكراتی كوردستان ل پارێزگەها دهۆكێ وەكهەڤی هەموو دەنگێن ئێكەتیێیە ل هەر چار پارێزگەهێن هەرێما كوردستانێ».
بەرپرسێ مەكتەبا رێكخستنا سلێمانیێ – هەلەبجە یا پارتی دیموكراتی كوردستان دوپاتی ل وێ چەندێ كر كو بۆ دانوستاندنێن پێكئینانا كابینەیا نوو یا حوكمەتا هەرێما كوردستانێ، پارتی دیموكراتی كوردستان هێلا سور ل سەر هیچ ئالییەكی نینە، بەلێ دڤێتن ئالی ژی قەبارەیێ خوە بزانن» .
