پارتی و ئێكه‌تی دێ هنده‌ك وه‌زیرێن نوو دانن
ئه‌ڤرۆ نيوز:
ئه‌ندامه‌كێ جڤاتا سه‌ركرداتیا پارتی دیموكراتی كوردستان ئاشكراكر، بڕیاره پارتی و ئێكه‌تی پێكڤه پۆستێن وه‌زیرێن ده‌ست ژكاركێشای یێن گۆڕان و یه‌كگرتوو تژی بكه‌ن، و لدۆر هه‌لبژارتنان ژی دبێژیت، ره‌وشا پارتی ل هه‌موو لایه‌نێن سیاسی باشتره و هه‌بوونا قه‌واره‌یێن نوو تنێ دێ كاریگه‌ری ل سه‌ر سنورێ سلێمانیێ هه‌بیت.
بلند ئیسماعیل، ئه‌ندامێ جڤاتا سه‌ركرداتیا پارتی دیموكراتی كوردستان بۆ رۆژناما ئه‌ڤرۆ گۆت: پارتی بزاڤان دكه‌ت جهێ وه‌زیرێن بزاڤا گۆڕان و یه‌كگرتوویا ئیسلامی یێن به‌ری نوكه خوه ژ حوكمه‌تێ ڤه‌كێشای تژی بكه‌ن، پارتی دیموكراتی كوردستان بۆڤێ مه‌ره‌مێ ده‌ست ب پێنگاڤێن خوه كریه و بڕیاره ب رێككه‌فتن ل گه‌ل ئێكه‌تیێ هه‌موو پۆستێن وه‌زاره‌تان یێن ب وه‌كاله‌ت دهێنه رێڤه‌برن بهێنه تژیكرن و وه‌زیر بۆ بهێنه دیاركرن، به‌لێ ئه‌ف وه‌زیرێن نوو تنێ پارتی و ئێكه‌تی دانن و له‌وانه‌یه ژی خه‌لكه‌كێ بێ لایه‌ن تێدا بیت، به‌لێ چو رێككه‌فتن ل گه‌ل لایه‌نێن دی ناهێنه كرن و وه‌زیر ب لایه‌نێن سیاسی ناهێنه‌دان، چونكه ته‌مه‌نی ئه‌ڤێ كابینا حوكمه‌تێ زۆر كێمێ مای ئه‌م یێ به‌ره‌ف هه‌لبژارتنان دچین، دێ پشتی پڕۆسا هه‌لبژارتنان كابینا نوویا حوكمه‌تێ هێته ئاڤاكرن، چونكه ئه‌م دخوازین ئه‌ف پۆسته بهێنه تژیكرن و هه‌موو ب وه‌كاله‌ت نه‌هێنه رێڤه‌برن، ژبه‌ركو گه‌هشتیه ئاسته‌كی نێزیكه كاروبارێن وه‌لاتیان بهێنه راگرتن ژبه‌ر نه‌مانا هژماره‌ك وه‌زیرێن حوكمه‌تێ، له‌وڕا له‌زێ یا تێته‌كرن پۆستێن وه‌زاره‌تان بهێنه تژیكرن و ئه‌ف ئاریشه‌یا ب وه‌كاله‌ت دوماهی بهێت.
ل دۆر ره‌وشا پارتی بۆ هه‌لبژارتنێن داهاتی بلند ئیسماعیل گۆت” راسته ل هه‌رێما كوردستانێ قه‌یران هه‌یه و مووچه گیرۆدبیت، به‌لێ جه‌ماوه‌رێ كوردستانێ ئه‌ڤێ راستیێ باش دزانیت هاتنا قه‌یرانان چو گونه‌ها پارتی نینه و هه‌موو بزاڤه‌ك یا تێته‌كرن قه‌یران بهێنه چاره‌سه‌ركرن و ره‌وشا وه‌لاتیان بهێته باشتركرن، ئه‌ڤه‌ژی ئه‌گه‌ره‌كه وه‌لاتی ئه‌ڤێ راستیێ به‌رچاڤ بكه‌ن و جه‌ماوه‌رێ پارتی بۆ هه‌لبژارتنێن داهاتیژی هه‌روه‌كی خوه مایه، چونكه پارتی جه‌ماوه‌ره‌كێ تایبه‌ت ب خوه هه‌یه و هه‌رده‌مێ پارتی پێدڤی ب ده‌نگدانێ یان پڕۆسه‌یه‌كادی هه‌بیت ئه‌ف جه‌ماوه‌رێ پارتی یێ به‌رهه‌ڤه پشكداریێ بكه‌ت و ده‌نگێ خوه بده‌ت، ئه‌ف لیست و قه‌واره‌یێن نووژی تنێ دێ كاریگه‌ری لسه‌ر سنورێ پارێزگه‌ها سلێمانیێ هه‌بیت و ده‌نگێن ئه‌ڤێ پارێزگه‌هێ دێ بۆ لیستێن نوو چن، ئه‌م پشتڕاستین هه‌بوونا لیستێن نوو كاریگه‌ریێن زۆر لسه‌ر ده‌نگێن پارتی نابن وه‌ك دبێژن پتر هه‌ڤڕكی یا ل سنورێ سلێمانیێ و هه‌له‌بجه.
