پارتی و گۆڕان ل سەر سێ خالان رێککەفتن
ئەڤرۆ نیۆز:
ئەڤرۆ شاندەکا پارتیێ ل گەل گۆرانێ کۆمبوون و ل سەر سێ خالان رێککەفتن و د داخۆیانیەکا فەرمی دا ئەڤ سێ خالە ژی وەسا هاتنە راگەهاندن.
ئێکەم: بهێزکرنا پەیوەندیێن هەر دو ئالیان کو ل گۆر رەوشا سیاسی و دبلۆماسی یا نها بیت و هەروەسا پەیوەندیێن ل گەل بەغدا و وەلاتێن دوروبەر کو ئەڤ پەیوەندیێن دو ئالی دڤێت د خزمەتا گەلێ کوردستانێ و بەرژەوەندیێن گشتی یێ خەلکێ کوردستانێ دا بیت.
دویەم: بزاڤ بهێتە کرن کو گۆتارەکا هەڤپشک ل دۆر کەرکووکێ و دەڤەرێن جهێ ئاریشە ل سەر بهێتە دروست کرن و بزاڤ بهێتە کرن ئالۆزی ل گۆر دستووری چارەسەر بن و مافێ هەموو ئالیان ژی بهێتە پاراستن.
سێیەم: ل دۆر کابینا نەهێ یا حوکمەتا هەرێما کوردستانێ ژی دانوستاندن هاتنە کرن و هەر دو ئالی ل سەر هندێ هەڤرا بوون کو دڤێت ژ بۆ قۆناغا داهاتی ئێک هەلویستیا هەموو ئالیان هەبیت و بزاڤ بهێنە کرن بۆ چاکسازیێ و باشترکرنا رەوشا ژیانا وەلاتیان، ژ بۆ بهێزکرنا پێگەهێ هەرێما کوردستانێ و چارەکرنا هەموو ئالۆزیان ژی پێنگاڤێن پێدڤی بهێنە هاڤێتن.