پارتی: پێدڤیە ئێکەتی بۆچوونا خوە یا فەرمی ل دۆر رێککەفتنا ستراتیژی رابگەھینیت
ئەڤرۆ نيوز:
پەیڤدارێ فەرمی یێ پارتی دیمۆکراتی کوردستان راگەھاند مەکتەبا سیاسی یا ئێکەتیێ رێککەفتنا ستراتیژی پشتگوھخستیە و دڤێت بڕیارەکێ ل دۆر بدەت، ئەڤجا چ بڕیار بیت، لێ پێدڤیە ئێکەتی بۆچوونا خوە یا فەرمی بۆ پارتی و گەلێ کوردستانێ رابگەھینیت.
مەحموود محەمەد پەیڤدارێ د رۆھنکرنەکێ دا راگەھاندیە، کو پارتی ھایداری داخویانیێن ھەڤدژێن کادر و ئەندامێن سەرکرداتیا ئێکەتیێ یە ل دۆر رێککەفتنا ستراتیژی یا د ناڤبەرا پارتی و ئێکەتیێ دا و ھندەک بەحسێ مان و پێگیربوونێ ب وێ رێککەفتنێ دکەن و ھندەک ژی ب ھەلوەشیایی ل قەلەم ددەن.
پەیڤدارێ فەرمی یێ پارتی دوپات کر کو ھێشا نە ب نڤیسار و نە ژی د کۆمبوونێن مە یێن ھەڤپشک دا ل گەل برایێن مە یێن ئێکێ بەحسێ پێگیربوون یان ژی ھەلوەشیانا ڤێ رێککەفتنێ نەکریە و ئەم وەکو پارتی رێککەفتنێ د بەرژەوەندیا گەلێ کوردستانێ دزانین و د پرسێن نەتەویی و نیشتیمانی دا و د ئێکرێزیا ناڤخوە دا رۆلەکێ گرنگ و بەرچاڤ ھەبوویە.
ھەر ل دۆر رێککەفتنا ستراتیژی، سەعدی ئەحمەد پیرە ئەندامێ مەکتەبا سیاسی یا ئێکەتی نیشتیمانی کوردستان راگەھاند، رێککەفتنا ستراتیژی د ناڤبەرا ئێکەتی و پارتی دا نەھەلوەشیایە و رێککەفتنا گۆڕان و ئێکەتیێ شوونگرێ رێککەفتنا ستراتیژی نینە.