پارتی ھەلویستێ خوە ل سەر سەرۆکێ پەرلەمانی گوھۆڕی
ئەڤرۆ نیوز:
ئەندامەکێ فڕاکسیۆنا پارتی دیموکراتی کوردستان ل پەرلەمانێ کوردستانێ راگەھاند، لیژنا کاراکرنا پەرلەمان و حوکمەتێ ھەموو دەستھەلاتەک یا ھەی بۆ چارەکرنا ئاریشان، ڕەشبینیا خوە ژی دیارکر کو لایەنێن سیاسی بگەھنە ڕێککەفتنێ، ھەروەسا دیارکر، قەیرانەکا مەزن ب سەر ھەرێما کوردستانێ دا ھاتیە و پێدڤی بوو ڕەوشا نەئاسایی ھاتبا راگەھاندن.
فەرحان جەوھەر، پەرلەمانتارێ پارتی دیموکراتی کوردستان ل پەرلەمانێ کوردستانێ بۆ رۆژناما ئەڤرۆ گۆت” لژنا بۆ کاراکرنا پەرلەمان و حوکمەتا ھەرێما کوردستانێ ھاتیە پێکئینان ھەموو دەستھەلاتەک یا پێ ھاتیە دان و ھەر بڕیارەکا دەربکەت، دێ ھێتە بجھئینان، مە وەکو پارتی چو خەتێن سوور نینن و ئەو خەتا سوور یا مە ل سەر دکتۆر یوسف محەمەد سەرۆکێ پەرلەمانی ھەی نوکە نەمایە و ھەر بڕیارەکا ل دۆر چارەنڤیسێ پەرلەمانی بھێتەدان دێ ھێتە بجھئینان”.
بەلێ فەرحانی گوت” ئەز یێ ڕەشبینم کو لایەنێن سیاسی بگەھنە چو ڕێککەفتنان و ڕەوشا پەرلەمان و حوکمەتێ بھێتە ئاساییکرن، ھیڤیدارین بگەھنە ڕێککەفتنێ بۆ چارەکرنا ئاریشان”.
ل دۆر خوەنیشاندان و تەقینا جەماوەری، فەرحان جەوھەری گۆت” چو ڕاستی بۆ سەرھەلدان و تەقینێن جەماوەری نینە و ئەڤ داخویانیێن ھژمارەکا پەرلەمانتاران دبێ بنەمانە، ژ بەر کو نوکە ڕەوش بەر ب باشتر دچیت و ل ڤێ حەفتیێ دێ موچێن فەرمانبەران ھێنە بەلاڤکرن و ھەیڤانە دێ موچە ھێنە مەزاختن، ئەوێ دھێتە ھەلگرتن ژی دێ ل گەل باشبوونا قەیرانا دارایی ھێتە مەزاختن”.
ب دیتنا وی” ژ بەر ڤێ ڕەوشا نوکە ب سەر ھەرێما کوردستانێ دا ھاتی، پێدڤی بوو بارێ نەئاسایی ل ھەرێما کوردستانێ بھێتە راگەھاندن، چونکی جیھان یا دگۆھۆڕینان دا و ئەڤ قەیران و ڕەوشا نەخواستی ژی ژدەرڤەی دەستھەلاتا ھەرێما کوردستانێ یە، ژوانا داکەتنا بھایێ پەتڕۆلێ و بڕینا بودجێ ھەرێمێ ژلایێ بەغدا ڤە و ھاتنا ھژمارەکا مەزن یا ئاواران، لەوما یا فەربوو ڕەوشا نەئاسایی ژلایێ لەشکری و دارایی ڤە بھێتە راگەھاندن”.
