پارتێن تورکیا چاڤ بەرداینە دەنگێ کوردان
ھەلبژارتنێن پێشوەخت دێ ل ٢٤ خزیرانا ئەڤسالە ل تورکیا برێڤە بچن و بەری نھا ئاکپارتیێ شیا بوو نێزیکی ٧٠ پەرلەمانتاران ل باکورێ کوردستانێ رەوانەی پەرلەمانێ تورکیا بکەت لێ ژ بەر سیاسەتا نەتەوەپەرستانە یا ئەردۆگانی نھا کوردێن باکور خوە ژ ئاکپارتیێ دوور کرینە و ب گشتی باکورێ کوردستانێ ١٣١ کورسی ل پەرلەمانێ تورکیا ھەنە و نھا پارتێن تورکیا چاڤ بەرداینە دەنگێ کوردان و دخوازن جارەکا دی کوردان ب خاپینن.
مستەفا بایرام چاڤدێرێ سیاسی ل باژێرێ ئامەدێ بۆ رۆژناما ئەڤرۆ دیار کر کو ھەلبژارتنێن پێشوەخت د بنەمایێ خوە دا پیلانا ئەردۆگانی و ئاکپارتیێ ل دژی ئیی پارتی (IYI PARTI) بوو، چونکو چەند مەھن راپرسی ل تورکیا و باکورێ کوردستانێ دھێنە کرن و بۆ ئەردۆگانی و ئاکپارتیێ دیار بوو ھەکە نھا زوو ھەلبژارتنان نەکەن رەنگە پشتی دەمەکێ دەنگێ وان کێمتر ببن و گۆت: (خالا دی یا گرنگ ئەردۆگان و دەولەت باخچەلی دخواستن ب رێیا ھەلبژارتنێن پێشوەخت رێگریێ ل پشکداریا ئیی پارتیێ بکەن، چونکو مەرال ئاکشەنەر سەرۆکا وێ پارتیێ ژ پارتیا دەولەت باخچەلی جودا بوو و وان دخواستن جارەکا دی دەنگێ ھەموو نەتەوەپەرستان بدەستڤە بینن، لێ پیلانا وان سەر نەگرت).
ل دۆر ھندێ کا بۆچی پیلانا وان سەر نەگریت ناڤبری دیار کر کو ئیی پارتی ل پەرلەمانێ تورکیا چو گرۆپ نەبوون، ئەردۆگانی دخواست ب رێیا کۆمسیۆنا بلندا ھەلبژارتنان ئاستەنگیان ل ھەمبەر پشکداریا ئیی پارتیێ دروست بکەت، لێ ئەندامێن سەرکردایەتیا پارتیا کۆماری یا گەل زوو ھەست ب پیلانا ئەردۆگانی کرن و ژ بەر ھندێ ژی ١٥ ئەندامێن پارتا کۆماری ل پەرلەمانێ تورکیا چوونە ناڤ رێزێن ئیی پارتی و وان ژی شیان فراکسیۆنا خوە ئاڤا بکەن و نھا چو کەس نەشێت رێگریێ ل ھەمبەر پشکداریا ئیی پارتیێ دروست بکەت، ب ڤی رەنگی ژی پیلانا ئەردۆگانی سەر نەگرت و نھا ژی رەوش ئالۆزتر بوویە.
چاڤدێرێ سیاسی ئەو یەک ژی دیار کر کو باکورێ کوردستانێ خوەدانێ ١٣١ کورسیانە ل پەرلەمانێ تورکیا، بەری نھا ئاکپارتیێ شیابوو ھەتا ٧٠ کورسیان ل باکورێ کوردستانێ بدەستڤە بینیت، لێ نھا رەوش ب تەمامی ھاتیە گوھۆرین، چونکو بەری نھا گەلەک کورد د ناڤا ئاکپارتیێ دا بوون و ئاکپارتی گەلەک سۆز بۆ چارەکرنا پرسا کوردی دابوون، لێ ھەلویستێ توند یێ ئەردۆگانی ل ھەمبەر ریفراندۆما باشورێ کوردستانێ و پاشی ژی ھەڤپەیمانیا ئەردۆگانی ل گەل پارتیا نەژادپەرست یا مەھەپێ وەسا کر کو رۆژ ب رۆژێ پتر کورد ژ ئاکپارتیێ دوور بکەڤن، نھا ژی ژ بلی ئاکپارتیێ ئیی پارتی و پارتیا کۆماری ژی چاڤ بەرداینە دەنگێ کوردان و دخوازن ب رێیا ھندەک گۆتنێن شرین و سۆزێن بێ بنەما دەنگێ کوردان بدەستڤە بینن و گۆت: (لێ ئەز باوەر ناکەم ڤێجارێ وەکو جارێن بۆری کورد دەنگێ خوە بدەنە پارتێن دی یێن تورکیا، لێ مخابن ھەدەپە ژی کو خوە وەکو نوونەرێ کوردان ددەتە نیاسین خوەدانێ چو بەرنامەکا وەسا بەرچاڤ بۆ کوردان نینە).
چاڤدێرێ سیاسی یێ باکورێ کوردستانێ ئەو یەک ژی دیار کر کو دەمەکە عەفرین ژ ئالیێ تورکیا ڤە ھاتیە داگیر کرن، کوردێن باکور ژ ھەلویستێ تورکیا و ب تایبەتی ژی یێ ئەردۆگانی توورە نە و گەلەک کەس نھا پەشیمانن کو بەری نھا دەنگێ خوە داینە ئاکپارتیێ، ئانکۆ مرۆڤ دشێت بێژیت دێ دەنگێ ئاکپارتیێ ل باکورێ کوردستانێ گەلەکێ کێم بیت، ئەردۆگان ھەست ب ھندێ یا کری و ژ بەر ڤێ یەکێ ژی ھەر زوو ھەڤپەیمانی ل گەل پارتیا نەتەوەپەرست دروست کر دا بشێت دەنگێ وان بدەستڤە بینیت، لێ مەھەپە ژی د ناڤا خوە دا بوویە دو پارچە و ئەو یەک ژی بوویە ئەگەرێ ھندێ کو ئەردۆگان ژ ئەنجامێن ھەلبژارتنان دلگرانە و گۆت: (ھەتا نھا دیار نینە کا دێ عەبدوللا گویل خوە بۆ پۆستێ سەرۆک کۆماریێ بەربژار کەت یان نە؟ لێ ھەکە پارتێن ئۆپۆزسیۆنێ ھەموو پێکڤە پشتەڤانیێ ل عەبدوللا گویل بکەن گویل دێ شێت ھەڤڕکیا ئەردۆگانی بکەت و دشێت سەرکەفتی ژی بیت، چونکو ئەز پشتراستم نھا ژی گەلەک ژ سەرکردە و ئەندامێن پەرلەمانی یێن ئاکپارتیێ پشتەڤانیێ ل گویل دکەن و ژ سیاسەتا ئەردۆگانی رازی نینن).
