پارتەکا نوو ل رۆژئاڤایێ کوردستانێ هاتە دامەزراندن
پارتەکا نوو ل رۆژئاڤایێ کوردستانێ هاتە دامەزراندن و سەرکردەکێ وێ پارتیێ ژی دیار دکەت، ئارمانجا وان بدەستڤەئینانا مافێن نەتەوی یێن گەلێ کوردستانێ یە و دڤێت د چارچۆڤێ بدەستڤەئینانا مافێن نەتەوی یێن گەلێ کوردستانێ دا ل سووریێ کار بهێتە کرن، لێ مخابن نها ئاستەنگیێن مەزن ل هەمبەر کار و خەباتا نەتەوی ل رۆژئاڤایێ کوردستانێ هەیە.
پارتەکا نوو یا سیاسی ب ناڤێ پارتا گەلێ کوردستان/ سووریا ل باژێرێ قامشلۆ ل رۆژئاڤایێ کوردستانێ ب فەرمی دامەزراندنا خوە راگەهاند، ئێک ژ سەرکردێن وێ پارتیێ ژی دیار دکەت، نها پتر ژ هەر دەمەکێ پێدڤیا گەلێ کورد ل رۆژئاڤایێ کوردستانێ و سووریێ ب خەباتەکا نەتەوی هەیە، چونکی سووریێ بەر ب گوهۆڕینێن مەزن ڤە دچیت و هەر گوهۆڕینەک ژی روو بدەت دێ کاریگەریا خوە ل سەر کوردان هەبیت، ژ بەر هندێ ژی دڤێت نها هەموو پارت و ئالیێن سیاسی یێن کوردی ل رۆژئاڤایێ کوردستانێ و سووریێ پێکڤە دەست ب قۆناغەکا نوو بکەن، چونکی هەکە کورد نها د چارچۆڤێ بەرەیەکێ نەتەوی دا پێکڤە کار نەکەن دێ زیانێن مەزن گەهنە پاشەرۆژا کوردان ل سووریێ.
ل گۆر راگەهاندنا دووماهیێ یا کۆنگرێ پارتا گەلێ کوردستان/ سووریا وان دڤێت مافێن کوردان د چارچۆڤێ دستوورەکێ نوو ل سووریێ دا بهێتە گەرەنتیکرن و شەرێ نها ل سووریێ بهێتە راگرتن، چونکی ب شەری نە قەیرانا نها ل سووریێ ب دووماهی دهێت و نە ژی کورد دگەهنە مافێن خوە، هەروەسا دڤێت د زووترین دەم دا بەرەیەکێ نەتەوی ل رۆژئاڤایێ کوردستانێ بهێتە ئاڤاکرن و هەموو هێز و ئالیێن سیاسی د چارچۆڤێ مافێن نەتەوی یێن گەلێ کورد دا پێکڤە کار بکەن، دڤێت د ڤێ چارچۆڤێ دا ئەنجوومەنێ نشتیمانی یێ کوردی ل سووریێ پتر ب رۆلێ خوە رابیت و ل گەل هەموو هێزێن دی یێن نەتەوی ل رۆژئاڤایێ کوردستانێ سەرکێشیا بزاڤا نەتەوی بکەت، هەروەسا دڤێت هەموو پێکهاتێن دی یێن نەتەوی و ئایینی ل سووریێ بگەهنە مافێن خوە، ژ بەر هندێ ژی پێدڤیا سووریێ ب دستوورەکێ نوو هەیە.
چاڤدێرێن سیاسی ل رۆژئاڤایێ کوردستانێ ژی دیار دکەن، نها گەلەک پارتێن سیاسی ل رۆژئاڤایێ کوردستانێ هەنە، پێدڤیا رۆژئاڤایێ کوردستانێ ب بەرەیەکێ نشتیمانی هەیە، دڤێت هەموو هێزێن سیاسی یێن کوردی د چارچۆڤێ بەرەیەکێ نەتەوی دا پێکڤە کار بکەن، چونکی نها ناکۆکیێن گەلەک مەزن د ناڤبەرا هێزێن سیاسی یێن کوردی دا هەنە، ب تایبەتی ژی دڤێت بەری هەر تشتەکێ هەر دو جڤاتێن کوردی یێن رۆژئاڤایێ کوردستانێ ئانکۆ ئەنجوومەنێ نشتیمانی یێ کوردی ل سووریێ و تەڤدەم بشێن هەموو پرسێن هەی د ناڤبەرا خوە دا چارەسەر بکەن، ژ بەر کو هەکە نها کورد د ناڤ خوە دا ئێکگرتی نەبن دێ زیانێن مەزن گەهنە کوردان ل سووریێ.
