پاركه‌ك د ناڤ سه‌نته‌رێ دهۆكێ دا هاته ڤه‌كرن
دهۆك، نه‌وزاد هلۆری:
ب مه‌ره‌ما خزمه‌تكرنا زێده‌تر یا باژێڕێ دهۆكێ و جوانكرنا سه‌ر و سیمایێ باژێڕی، ب به‌رهه‌ڤبوونا پارێزگارێ دهۆكێ قووناغا ئێكێ یا پاركا های پارك ل ناڤا بازاڕێ دهۆكێ هاته ڤه‌كرن، كو هه‌ر ل سه‌ر شێوه‌یێ كه‌ڤنار یێ دهۆكێ هاتیه چێكرن.
كوردۆ ئێحسان، رێڤه‌به‌رێ گشتیێ وه‌به‌رهێنانێ ل پارێزگه‌ها دهۆكێ د كۆنگره‌یه‌كێ رۆژنامه‌ڤانی دا گوت: (ب مه‌ره‌ما خزمه‌تكرنا زێده‌تر یا باژێرێ دهۆكێ قوناغا ئێكێ یا پاركا های پارك ل سه‌نته‌رێ باژێڕێ دهۆكێ و ل ته‌نشت پاركا نه‌ورۆز هاته ڤه‌كرن).
زێده‌تر گوت: (ل جهێ پاركێ ئیكه‌م قوتابخانا پارێزگه‌ها دهۆكێ لێ هه‌بوو و پاشی ببوو هونه‌رێن جوان یا دهۆكێ، ژ به‌ر ڤێ پارك و ئاڤاهیێ قوتابخانێ هه‌ر ل سه‌ر ره‌نگێ كه‌ڤنار یێ وی ده‌می هاتیه چێكرن ڤه و تێدا كومه‌كا چالاكیێن جودا یێن كه‌لتوری و خوارنێن كورده‌واری و ره‌سه‌ناتیا كه‌له‌پورێ دهۆكێ هاتینه پاراستن، پارك ژ لایێ كه‌رتێ تایبه‌ت ب گرێبه‌ست ل گه‌ل پارێزگه‌ها دهۆكێ هاتیه چێكرن و چونا ژوور بێ به‌رامبه‌ره).
كوردۆی دیار كر ژی كو قووناغا دویێ دێ پاركێن زێده‌تر یێن كه‌سكاتی و پاركا راوه‌ستانا ترۆمبێلان ژی هێنه چێكرن و گوت: “ئه‌ڤ پاركه دێ وه‌كو سه‌نته‌ره‌كێ ساخكرنا چالاكیێن كه‌لتوری و كه‌له‌پوری ل پاشه‌رۆژێ سه‌ره‌ده‌ری ل گه‌ل هێته كرن و چه‌ندین كه‌س دێ تێدا كار كه‌ن”.
