پاركەكا شوونواری ل شكەفتا شانەدەر دێ هێتە ڤەكرن
پەیڤدارێ رێڤەبەریا گشتیا شوونواران ئاشكرا كر، ل رۆژا 8/5/2024 رێورەسمەك ل شكەفتا شانەدەر بهێتە ئەنجامدان و بڕیارە پاركەكا شوونواری ل شانەدەر بهێتە ڤەكرن و ئەو شوونوارێ ژ لایێ تیمەكا بەریتانی ڤە هاتیە دیتن یێ سەردەمێ نیاندەرتالە و دیرۆكا وێ ژنێ بۆ 75 هزار سالان بەری نوكە ڤەدگەڕیت.
رامیار جەوهەر، پەیڤدارێ رێڤەبەریا گشتیا شوونواران ل هەرێما كوردستانێ بۆ رۆژناما ئەڤرۆ دیار كر، ئەو شوونوارێ ل شكەفتا شانەدەر هاتیە ڤەدیتن دیرۆكا وێ بۆ بەری 75 هزار سالان ڤەدگەڕیت و گۆت: «بۆ جارا ئێكێ شوونوارەكێ هوسا دیرۆكی یێ سەردەمێ نیاندەرتال دهێتە دیتن، بڕیارە رۆژا چارشەمبیا داهاتی رێورەسمەك ب هەلكەفتا ڤەدیتنا ئەڤی شوونواری ل شكەفتا شانەدەر بهێتە گێڕان، چونكی ئەو شوونوارێ هاتیە ڤەدیتن و ئەو ژنا ڤەكۆلین ل سەر هاتیە كرن بۆ 75 هزار سالان بەری نوكە ڤەدگەڕیت».
رامیار جەوهەر گۆتژی: «ل سالا 2012ێ وەرە حوكمەتا هەرێما كوردستانێ گرێبەستەك ل گەل تیمەكا زانكۆیا كامبریج یا بریتانی ئیمزاكریە و دەست ب ڤەكۆلینان كریە ل دۆر شوونوارێ شانەدەر ل سنوورێ دەڤەرداریا مێرگەسۆر و بڕیارە پاركەكا شوونواری ژی ل شكەفتا شانەدەر بهێتە ڤەكرن».
