پاره‌كێ مه‌زن بۆ كوردستانێ دێ هێته هنارتن
ئه‌ڤرۆنيۆز:
ئه‌ندامه‌كێ لژنا دارايى ل جڤاتا نوونه‌رێن عيراقێ ئاشكراكر كو ل هه‌فتيا بهێت دێ پارێ گه‌نمێ جوتيارێن هه‌رێما كوردستانێ هێته مه‌زاختن.
مه‌سعود حه‌يده‌ر ئه‌ندامێ لژنا دارايى ل جڤاتا نوونه‌رێن عيراقێ راگه‌هاند، پارێ سێ سالان يێ جوتياران دێ هێته مه‌زاختن.
وى په‌رله‌مانتارى د به‌ياننامه‌كێ دا گۆت، شيستێن دارايى يێن جوتيارێن هه‌رێما كوردستانێ بۆ سالێن 2014 و2015 و2016 دراستڤه‌كرنا قانوونا بودجا سالا 2017 هاتيه چه‌سپاندن ومه‌رجێ مه ئه‌وبوو كو حه‌يدر عه‌بادى سه‌رۆك وه‌زيران ب خوه ببينين ومه سۆز ژێ وه‌رگرت كو ئه‌ڤ ساله پاره‌ى ب مه‌زێخيت وسۆزا خوه بجهئينا.
دياركر، ل ده‌مێ بۆرى بريارا مه‌زاختنا پارێ گه‌نمێ جوتيارێن كوردستانێ هاتبوو دان ونوكه ژى ل گه‌ل وه‌زاره‌تا بازرگانى مه ئاخڤتيه وبرياره ب دو گه‌را سه‌رجه‌مێ پاره‌ى بهێته مه‌زاختن.
دووپاتكر ژى كو ل هه‌فتيا بهێت دێ نيڤا پاره‌ى هێته مه‌زاختن ول مه‌ها 12 يا ئه‌ڤ ساله نيڤا دى دێ هێته مه‌زاختن.
سه‌رجه‌مێ پارێ گه‌نمێ جوتيارێن هه‌رێما كوردستانێ بۆ سالێن 2014 و 2015 و2016 زێده‌تره ژ 600 مليار ديناران.
