پارچێن ئەردی ل سەر فیتەران دێ ھێنە بەلاڤکرن
ئه‌ڤرۆ نيوز:
سەرۆکێ جڤاتا باژێرڤانیا پارێزگەھا دھۆکێ دیار کر کو ل رۆژا 23-10-2018 ھندەک فیتەرێن پارێزگەھا دھۆکێ بۆ چارەسەرکرنا ئاریشێن خوە یێن فیتەریێ قەستا مە کرن، وان داخواز کر غەدر ل وان نەھێتە کرن دەمێ ژ پیشەسازیا کەڤن ل بەرۆشکی دھێنە ڤەگوھاستن بۆ پیشەسازیا نوو ل دەڤەرا ئالۆکا.
عسمەت بۆتی، سەرۆکێ جڤاتا باژێرڤانیا پارێزگەھا دھۆکێ بۆ رۆژناما ئەڤرۆ دیار کر کو لیژنەک بۆ بەلاڤکرنا پارچەیێن ئەردی ل سەر فیتەران ل دەڤەرا نزارکێ ھاتیە دروستکرن، نوکە کار بەردەوام یێ دھێتە کرن فیتەر ل جھێن خوە یێن کەڤن نەمینن و جھێن نوو بۆ وان دھێنە چێکرن و گۆت: “بەری نوکە ھندەک فیتەران ب ریێا پشککێشانێ پارچە زەڤی وەرگرتینە و ھندەک فیتەر ژی ماینە دێ وەرگرن، ژ بەر ھندەک ئاریشەیان بەلاڤکرنا ئەردی ل سەر فیتەران گیرۆ بوو، پشتی ئەو ئاریشە چارەسەر دبن دێ پارچە زەڤیان وەرگرن”.
گۆتژی: “نوکە چارەسەرکرنا وان ئاریشەیان گەھشتیە قووناغێن دووماھیێ و بەرھەڤی ھاتینە کرن ھەموو فیتەر پارچە زەڤیان وەربگرن کو ئەو ژی دێ ب ریێا پشککێشانێ ئەرد ل سەر فیتەران دێ ھێتە بەلاڤکرن”.
سەرۆکێ جڤاتا باژێرڤانیا پارێزگەھا دھۆکێ ئاماژە ب وێ چەندێ ژی کر، ب مەرەما چارەسەرکرنا ئاریشێن خوە ھندەک فیتەران سەرا باژێرڤانیا دھۆکێ کرن و گۆت: “مە ئەو فیتەرە پشتڕاستکرن کو غەدر ل فیتەران ناھێتە کرن، ب تایبەتی ل جھێ فیتەران ل پیشەسازیا کەڤن ل بەرۆشکێ، د بەرنامەی دایە بھێـتە راکرن، ل ئالۆکا پشەسازیا نوو بھێتە دانان، نوکە د قووناغێن کاری دایە و نەخشە و ھەموو ئامادەکاری ژی بۆ ھاتینە کرن، دێ فیتەر ژ پیشەسازیا کەڤن ھێنە ڤەگوھاستن بۆ پشەسازیا نوو ل دەڤەرا ئالۆکا”.
