پارێزگارێ دهۆكێ: دخوازین كۆمپانی و به‌لێنده‌ر بله‌ز ده‌ست ب ته‌مامكرنا پڕۆژه‌یێن خوه بكه‌ن
ئه‌ڤرۆ:
د. عه‌لی ته‌ته‌ر، پارێزگارێ دهۆكێ ب هه‌ڤالینیا حه‌مید عه‌لی، رێڤه‌به‌رێ گشتی یێ كۆمه‌لگه‌ها ده‌رگه‌هێ نێڤده‌وله‌تی یێ ئیبراهیم خه‌لیل دوهی 27/6/2022 سه‌ره‌دانا لقێ نه‌هێ پارتی دیموكراتی كوردستان كر و ژ لایێ سه‌باح به‌یتولا، به‌رپرسێ لقێ نه‌هـ و كارگێرێن لقێ پێشوازی لێ هاته كرن، د روونشتنه‌كێ دا ب به‌رهه‌ڤبوونا ده‌ڤه‌ردارێن ئاكرێ و به‌رده‌ڕه‌ش و هه‌ژماره‌كا رێڤه‌به‌ریێن په‌یوه‌ندیدار باس ل ره‌وشا پڕۆژه‌یێن خزمه‌تگوزاری و تمامكرنا پڕۆژه‌یێن ب نیڤه‌رۆ و راوه‌ستیایی ماین و قووناغا ئێكێ یا ئه‌ڤ ساله بۆ پڕۆژه‌یێن هه‌ردو ده‌ڤه‌رداریان هاته كرن و پارێزگاری ته‌كه‌ز كر كو د ده‌مه‌كێ نێزیك دا ئه‌و پڕۆژه‌یه دێ كه‌ڤنه د وارێ بجهئینانێ دا.
پارێزگارێ دهۆكێ دیار كر كو ل ڤان رۆژان هه‌ژماره‌كا پڕۆژه‌یێن نوو ل ده‌ڤه‌رداریێن ئاكرێ و به‌رده‌ڕه‌ش دێ هێنه ئه‌نجامدان و پارێ پێدڤی ژی هاتیه به‌رده‌ستكرن بۆ ته‌مامكرنا وان پڕۆژه‌یێن پار ماینه ب نیڤه‌رۆ، دیسا داخواز ژ كۆمپانی و به‌لێنده‌ران كر، بله‌ز ده‌ست ب ته‌مامكرنا پڕۆژه‌یێن خوه بكه‌ن و پشته‌ڤانیا پارێزگه‌هێ بۆ هه‌ر هاریكاریه‌كێ دیار كر.
د. عه‌لی ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانی دا خویا كر، سه‌رۆكێ حكومه‌تا هه‌رێما كوردستانێ رازیبوونا خوه دیاركریه و پارێ پێدڤی بۆ پڕۆژه‌یان هاتیه دابینكرن و هه‌موو كۆمپانی و به‌لێنده‌ر دشێن ئێكسه‌ر ده‌ست بجهئینانا وان پڕۆژه‌یان بكه‌ن یێن د سالا بۆری دا ماینه ب نیڤه‌ر و گوت: “وه‌كو قووناغا ئێكێ هه‌ژماره‌كا پڕۆژه‌یێن خزمه‌تگوزاری یێن نوو دێ هێنه ئه‌نجامدان و ل ڤان رۆژان ب رێكا ته‌نده‌ران ده‌ست ب وان پڕۆژه‌یان دێ هێته كرن، ژبلی وان گه‌له‌ك پڕۆژه ب رێكا وه‌زاره‌تان ژی دێ هێنه ئه‌نجامدان و پشتی هنگی دێ ده‌ست ب قوناغادووێ هێته كرن و هه‌ژماره‌كا دی یا پڕۆژه‌یێن فه‌ر دێ هێنه چێكرن”.
دیسا هه‌ر دوهی و بۆ زانین و دووڤچوونا ئه‌نجامدانا ئه‌زموونێن قووناغا 12 ئاماده‌یی د. عه‌لی ته‌ته‌ر، پارێزگارێ دهۆكێ، و د گه‌ل دا عومه‌ر عه‌لی ته‌ها، رێڤه‌به‌رێ گشتی یێ په‌روه‌ردێ سه‌را ئاماده‌یا دهۆك یا كچان دا و ژ نێزیك سه‌حكره ره‌وشا قوتابیان و گۆت: “مه وه‌كو حكومه‌تا هه‌رێما كوردستانێ و ده‌زگه‌هێن په‌یوه‌ندیدار ل پارێزگه‌ها دهۆكێ هه‌موو ئاماده‌كاری كرینه ژ بۆ پاراستن و گه‌هاندن و به‌لاڤكرنا پرسیاران و سه‌قایه‌كێ باش ژ هه‌موو رویه‌كیڤه بۆ قوتابیان دابینكریه، كو بشێن ئه‌زموونێن خوه ب ئارمی ئه‌نجام بده‌ن”.
