پارێزگارێ دهۆكێ تەكەزیێ ل سەر چێكرنا پاركان و پاقژكرن و رێكخستنا جاددەیان دكەت
د. عەلی تەتەر، پارێزگارێ دهۆكێ دوهی 14/4/2024 ل ئاڤاهیێ دەڤەرداریا دهۆكێ كۆمبوونەك ل گەل ئیسماعیل محەمەد ئەحمەد، دەڤەردارێ دهۆكێ و مللەت سالم، سەرۆكێ باژێرڤانیا دهۆكێ و چەند ئەندازیارێن باژێرڤانیا دهۆكێ ئەنجام دا.
د كۆمبوونێ دا بەحسێ رەوشا باژێرێ دهۆكێ و ئەو زیانێن ژ ئەنجامێن لەهیان و ئاگربەربوونێ گەهشتینە چەند تاخ و وەلاتیان و زیانێن گەهشتینە دوكاندار و كاسبكاران و رۆلێ حوكمەتا هەرێما كوردستانێ بۆ سڤككرنا وان زیانان ل سەر وەلاتیان و سەخبێركرنا جاددە و كۆلان و جهێن گشتی یێن زیانڤێكەفتین و بەرنامێ پارێزگەهێ بۆ چێكرنا پاركێن تاخێ سەرهلدان و ئالۆكا هاتە كرن.
پارێزگارێ دهۆكێ تەكەز كر كو دڤێت ب زووترین دەم دەست ب چێكرنا رووبارێ هشكەڕۆ و هەردو پاركان بهێتە كرن و جهێن زیانڤێكەفتی بهێنە دورستكرن و رێگری ل هەموو زێدەگاڤیان بهێتە كرن.
پاشی پارێزگارێ دهۆكێ و یێن د گەل دا سەرا رێڤەبەریا ئاڤا دهۆكێ و چەند رێڤەبەریان ل سەر جادا گشتی یا بارزان دا و ژ نێزیك سەحكرە رەوشا جاددە و باخچەیێن وان رێڤەبەریان و تەكەزی ل سەر رێكخستن و پاقژیا گشتی یا ئاڤاهیان و باخچەیێن دەوروبەرێن وان كر و پشتەڤانیا پارێزگەهێ بۆ هەر هاریكاریەكێ دیار كر.
دیسا هەر دوهی 14/4/2024 د. عەلی تەتەر، پارێزگارێ دهۆكێ پشكداری د بەرنامێ چاندنا شتلێن داران دا ل پاركا ئالۆكان دا كر و دوپاتی ل سەر سەخبێركرن و چاڤدانا هەر دارەكا دهێتە چاندن دا كر و دەستخوشی ل هەموو لایەنان و رێكخراوا (ILO) هەمبەر چاندنا نێزیكی 12 هزار شتلێن داران د ناڤ پاركا ئالۆكان دا كر.
هەژی گوتنێ یە بەری نوكە كارگێریا پارێزگەها دهۆكێ ب هەڤكاری ل گەل لایەنێن پەیوەندیدار دەست ب هەوەكا بەرفرەه یا دارچاندنێ ل پاركا ئالۆكا و كێلیا شەدا و چەند جهێن دی ل دهۆكێ وسێمێلێ كربوو و ب هزاران شتلێن داران هاتبوونە چاندن.
دیسا هەر دوهی 14/4/2024 د. عەلی تەتەر، پارێزگارێ دهۆكێ و ب مەرەما دووڤچوونا پڕۆژەیێن خزمەتگوزاری یێن حوكمەتا هەرێما كوردستانێ سەرا پڕۆژەیێن جاددەیا شێست متری و چەند جاددەیێن سیه متری ل كۆمەلگەها تەناهیێ یا سەر ب دەڤەرداریا سێمێلێ دا و ژ نێزیك سەحكرە قوناغێن بجهئینانێ.
پارێزگارێ دهۆكێ تەكەز كر كو دڤێت هەموو پڕۆژە و جاددە ل دووڤ پیڤەرێن ئەندازیاری و ب كوالیتیەكا باش و د دەمێ دەستنیشانكری دا بهێنە ئەنجامدان و بكەڤنە د خزمەتا خەلكێ دەڤەرێ دا.
