پارێزگارێ دهۆكێ كۆمبوونەك ل دۆر دەستپێكرنا پرۆسا دروون و بازاڕكرنا گەنمێ جۆتیاران كر
ئەڤرو ٢٩ـێ نیسانا ٢٠٢٤ـێ ب سەرپەرشتیا د. عەلی تەتەر، پارێزگارێ دهۆكێ و ب ئامادەبوونا جێگرێ پارێزگاری و دەڤەردارێن سنوورێ پارێزگەها دهۆكێ و رێڤەرێن سایلۆیێن گەنمی و چەندین لایەنێن پەیوەندیدار، دوهی 29/4/2024 كۆمبوونەك ل دۆر نێزیكبوونا پرۆسا دروون و ب بازركرنا گەنمێ جۆتیاران و ژ پێخەمەت ئامادەكاریان بۆ پلانەكا گونجای بۆ چارەسەركرنا كێماسیێن د كەڤنە د رێكا پرۆسا ناڤبری دا هاتە ئەنجامدان و پارێزگارێ دهۆكێ هەموو لایەنێن پشكدار راسپاردن ب شێوەكێ بێ كێماسی د خزمەتا پرۆسێ دا بن.
د كۆمبوونێ دا چەند راسپاردە و بڕیار هاتنەدان، ژ وان: ل دووڤ سنوورێ جوگرافی پلانا وەرگرتنا بەرهەمێ گەنمێ جۆتیاران دێ هێتە بەلاڤكرن و گەنم ل هەرسێ سایلۆیێن زاخۆ و فەیدیێ و شێخان دێ هێتە وەرگرتن. بەرهەمێ جۆتیاران بێی لێبڕین دێ هێتە وەرگرتن و ل دووڤ پشكنینان ئاسانكاری بۆ بهێنەكرن. ب هیچ شێوەكی بەرهەمێ گەنمێ جۆتیاران بێی پەسەندێن رێڤەبەریێ ناهێتە وەرگرتن و رێ ناهێتەدان بۆ هاتنا گەنمێ هاوردە بۆ ناڤ سنوورێ پارێزگەها دهۆكێ. كاراكرنا لیژنێن سالانە ل سەر ئاستێ دەڤەرداریان بۆ بجهئینانا چەند رێنمایان و ئاسانكاری بۆ ڤەگوهاستنا ئامیرەیێن گەنمێ جۆتیاران بهێنە كرن و تیمێن هاتنوچوونێ و پۆلیسان و بەرگریا شارستانی و سازیێن ئێمناهیێ د ئامادەباشیێ دا بن بۆ هەر روودانەكا نەچاڤەرێكری.
دیسا هەر دوهی د. عەلی تەتەر، پارێزگارێ دهۆكێ پێشوازی ل ئومێد خوشناو، پارێزگارێ هەولێرێ و شاندێ د گەل دا كر، د روونشتنەكێ دا هەردو لایان بەحسێ پڕۆژەیێن خزمەتگوزاری یێن حوكمەتا هەرێما كوردستانێ ب گشتی و رەوشا هەردو پارێزگەهان و ئەو روودانێن نەچاڤەرێكری یێن لەهیان و ئاگربەربوونێ و هەڤكاریا بەردەوام یا هەردو پارێزگەهان د گەل ئێك دا كر.
دیسا هەر دوهی د. عەلی تەتەر، پارێزگارێ دهۆكێ پێشوازی ل جان نیكۆلا بیوز، سەرۆكێ رێكخراوا «UNHCR» ل ئیراقێ و شاندێ د گەل دا كر و د روونشتنەكێ دا ل دۆر بابەتێ ئاوارەیێن شنگالێ و نووترین پێشهاتان دانوستاندن هاتە كرن.
