پارێزگارێ مووسل سه‌ر سۆزا خوه نه‌ما
ئەڤرۆ نيوز، نیوار محەمەد سەلیم:
بڕیار بوو دوھی رۆژا چارشەمبی رێکەفتی 31ی چریا ئێکێ 2018 جڤاتا شەرعی یا قەزا شنگال دەست ب کار بیت، بەلێ پەکەکێ و حەشدا شیعی رێ نەدا، بەرپرسێ لقا شنگال یا پارتی ژی ب خیانەت وەسفکر.
قادر قەچاخ بەپرسێ لقا 17 ل شنگال یا پارتی دیموکراتی کوردستان د داخۆیانیەکێ دا بۆ رۆژناما ئەڤرۆ گۆت: “رێ گرتن ل ئیدارا شەرعی یا شنگال خرابترین رەفتار بوو حوکمەتا عیراقێ و حەشدا شیعی ئەنجام دایی کو رێ نەدایە جڤاتا شنگال دەست ب کار بیت، ھەر چەندە ھێشتا ڤەنەگەریاینە”.
زێدەتر گۆت: پارێزگارێ نەینەوا و فەرماندێ ھێزێن لەشکری سۆزا خوە ب جە نەئینایە و ل گەل نەچووینە نوکە دھێتە گۆتن کو یێن ب دووڤ دا چووین.
بەرپرسێ لقا 17 یا پارتی دیموکراتی کوردستان ل شنگال دا زانین ژی کو ل سنونێ ئیدارا شەرعی یا ڤەگەریایی ب تنێ ل شنگال یا مایی.
دەربارەیی بزاڤێن پەکەکێ بۆ رێگریگرتن ل ئیدارا شەرعی یا شنگال، قادر قەچاخ گۆت: “ل شوونا پەکەکە بەرێ تڤەنگێن خوە بدەتە وان عەرەبان یێن دچنە سەر گۆندێن کوردێن ئێزدی یان ژی بدەتە دوژمنێ خوە یێ سەرەکی کو ل باکوورە، یێ دایە برایێن خوە ل باشوور”.
گۆتژی: یێ کچ و کوڕێن ئێزدین دھنێرنە شەری و ئەو ب خوە دمیننە ل چیایێن گارەیی و شنگالێ کو چو کار و ئارمانجێن وان ل وێرێ نینن.
ل دۆر چاوانیا رێگریکرنێ ژی گۆت: حەشدا شەعبی یا رابوویی ھندەک عەرەب ژ بلێج، بەعاج و دومیز ئیناین، رێیا لێ گرتی کو ئەو ئیدارا نوونەراتیا 85%ێ ژ خەلکێ دەربەدەر یێ شنگال پێک دھێت نەھێلایە ڤەگەریت و ئەز باوەر دکەم کو ئەڤە پلانە ل دژی ئیدارا شەرعی و دیموکراتیێ و دستووری و ماددا 140 دا کو جھێ خوە نەگریت، بەلێ دآ ل سەر بزاڤێن خوە د بەردەوام بین و شنگال ھەر یا شنگالینە.
د پرسا وێ چەندێ کا دا چەند دەستێ پارێزگارێ نەینەوا ل گەل ڤێ چەندێ یە، قادر قەچاخ گۆت: “پارێزگارێ مووسل ل گەل نەچوویە و ژ خەمساریا وی ئەڤ چەندە روو دایە و ئەڤ چەندە ژی نیشانا وێ چەندێ یە کو مرۆڤەکێ بێ ھەلویستە”.
سەرۆکێ جڤاتا قەزا شنگالێ راگەھاند، پەکەکێ خەلک و چەکدار و لایەنگرێن خوە ھانداینە خوەنیشدانان دژی زڤرینا ئیدارا شەرعی یا شنگالێ ئەنجام بدەن.
وەیس نایف، سەرۆکێ جڤاتا قەزا شنگالێ گۆت: ”پشتی کۆمبوونا ئیدارا پارێزگەھا نەینەوا و ئیدارا قەزا شنگالێ، بڕیار ھاتە دان ئەڤرۆ چارشەمبی ئیدارا شەرعی یا شنگالێ بزڤریتە قەزا شنگالێ، بەلێ ل سپێدێ پەکەکێ لایەنگر و ھژمارەکا چەکدارێن خوە ھانداینە بۆ رێگریکرنێ ل زڤرینا ئیدارا قەزایێ.
