پارێزگارێ نوو يێ سلێمانيێ: بو به‌رمیله‌كا نه‌فتێ ئه‌م وه‌لاتێ خوه پارچه پارچه ناكه‌ين
ئه‌ڤرۆ نیوز ، هلۆرى:
پشتى كو ده‌ست ب كار بوى وه‌كو پارێزگارێ نوویێ سلێمانیێ ، هه‌ڤال ئه‌بوبه‌كر دیاركر كو هه‌ر بزاڤه‌كا ئه‌و بهاڤێژن بۆ پارێزگه‌ها سلێمانیێ بو دابینكرنا خزمه‌تگوزاریێن ده‌ستپێكى ، دێ دچارچوڤێ حكومه‌تا هه‌رێما كوردستانێ بیت و چوو پێنگاڤه‌كێ به‌ر ب پارچه‌بوون و هه‌لوه‌شاندنا قه‌واره‌یێ هه‌رێمى ناهاڤێژیت.
هه‌ڤال ئه‌بو به‌كر دچارچوڤێ پشكداریكرن دبه‌رنامه‌یێ ل گه‌ل روودانان ل رادیویا نه‌وا ل بارا وێ یه‌كێ پشتى ده‌ست ب كاربونا خوه ، ئه‌رێ ئێكسه‌ر دێ مامه‌له‌یێ ل گه‌ل به‌غدا كه‌ت یان نه؟ دیاركر كو ل هه‌رێما كوردستانێ حكومه‌ت و په‌رله‌مان هه‌یه و هه‌رێما كوردستانێ ژ روویێ سیاسى و قانونى و كارگێرى ڤه ده‌ستوورێ عیراقێ دانپێدان پێ كریه و ژبه‌رڤێ نابیت پێنگاڤه‌كێ ب هاڤێژین بو پارێزگه‌ها سلێمانیێ د چارچوڤێ حكومه‌تێ دا نه‌بیت.
دوپات ژى كر كو ئه‌و به‌رهه‌ڤ نینن دپێناڤ تشته‌كێ ده‌مكى دا سه‌روه‌ریا قانون و سه‌روه‌ریا وه‌لاتى بێخنه ژێر پرسیارێ؟ هه‌ڤال ئه‌بوبه‌كر د هه‌مان ده‌م دا به‌حس ل وێ یه‌كێ ژى كر كو ئه‌و دێ هه‌موو شیانێن خوه ئێخنه كار و ب پشته‌ڤانیا حكومه‌تا هه‌رێما كوردستان و حكومه‌تا خوه‌جهى و حكومه‌تا فیدرالى كو خزمه‌تگوزاریێن ده‌ستپێكى بو وه‌لاتیان بهێنه دابینكرن ، به‌لێ بو دابینكرنا به‌رمیله‌كا نه‌فتێ ئه‌و وه‌لاتێ خوه پارچه پارچه ناكه‌ن
