پارێزگارێ کەرکووکێ رێ یێ نادەت خەلکێ 500 گوندێن کوردان ئەردێ خوە بکاربینن
ئه‌ڤرۆ نيوز:
بەرپرسەکێ کورد ل دەوروبەرێ کەرکووکێ ئاشکرا کر کو ئینانا عەرەبێن شۆڤێنی بۆ کەرکووکێ و دەوروبەرا یا بەردەوامە و ل گورەی بڕیارەکا پارێزگارێ کەرکووکێ کارێ جۆتیاریێ و کێلانا ئەردێ 500 گوندێن کوردان ھاتیە قەدەغەکرن.
لوقمان حسێن، رێڤەبەرێ ناحیا سەرگەڕان یا سەر ب پارێزگەھا کەرکووکێ بۆ رۆژناما ئەڤرۆ دیار کر کو پڕۆسا ب عەرەبکرنا دەڤەرێن کوردی یا بەردەوامە و ھەتا نوکە ھژمارەکا مەزن یا عەرەبێن شۆڤێنی ل دەڤەرێن جودایێن عیراقێ ھاتینە سەر ئەردێ کوردا و داگیرکریە، مخابن پارێزگارێ ب وەکالەت یێ کەرکووکێ و پۆلیسێن فیدڕالی ژی رۆلەکێ خراپ د پڕۆسا داگیرکرنا ئەردێ کوردان دا ھەیە، چونکی پشتەڤانیا ھاتنا عەرەبێن شۆفێنی دکەن بۆ کەرکووکێ و کورد ژی پشتی روودانێن 16ی ئۆکتۆبەرێ بێ دەستھەلات ماینە ل دەڤەرێ و رۆژانە ئەردێ وانا دھێتە داگیرکرن.
ناڤھاتی خویا کر کو ھژمارەکا عەرەبێن شۆفێنی سکاڵایەک تۆمارکریە و ل گورەی نڤیسارەکا پارێزگارێ کەرکووکێ بکارئینانا ئەردێ کوردان ژلایێ خودانێن وان یێن کورد ڤە ھاتیە قەدەغەکرن ھەتا وی دەمێ ئاریشا د ناڤبەرا کورد و عەرەبێن بۆ داگیرکرنێ ھاتینە کەرکووکێ ب دووماھی دھێت و گۆت: “ھەکە ب ڤی دەست و داری بیت و پارێزگار یێ رژدبیت ل سەر بڕیارا خوە دێ بکارئینانا ئەردێ 500 گوندێن کوردان ھێتە قەدەغەکرن و جۆتیارێن کورد نەشێن زەڤیێن خوە بکێلن”.