پارێزگه‌رێ دهۆكێ پێشوازیا بالیۆزێن ئه‌لمانیا و فره‌نسا كر
ئه‌ڤرۆنيوز:
سپێده‌يا ئه‌ڤرۆ سێشه‌مبى 20/2/2018، فه‌رهاد ئه‌مین پارێزگه‌رێ دهۆكێ پێشوازیا (سیریل نان)(Cyrill Nunn) بالیوزێ ئه‌لمانیا ل عیراقێ و(برونو ئوبیرت)(Bruno Aubert) بالیوزێ فره‌نسا ل به‌غدا وشاندێ دگه‌لدا كر.
دهه‌ڤدیتنه‌كێ دا ب به‌رهه‌ڤبوونا ئيسماعیل محه‌مه‌د هاریكارێ پارێزگه‌ری بۆ كاروبارێن مرۆڤایه‌تی، به‌حسێ په‌یوه‌ندیێن دو قولی یێن ب هێز دناڤبه‌را هه‌رێما كوردستانێ وحوكمه‌تێن (فره‌نسا وئه‌لمانیا) وئه‌و هاریكاریێن هه‌ردو وه‌لاتێن ناڤبری پێشكێشی هه‌رێما كوردستانێ كرین دبیاڤێن سیاسی وله‌شكری ومرۆڤایه‌تی دا، تایبه‌ت هاریكاریكرنا هێزێن پێشمه‌رگه‌ی بۆ تێكشكاندنا تیرۆرستێن داعشێ، هاته كرن.
دته‌وه‌ره‌كێ دى دا به‌حسێ ره‌وشا ئاواره وپه‌نابه‌ران ل سنورێ پارێزگه‌ها دهۆكێ وئه‌و هاریكاریێن پارێزگه‌ها دهۆكێ ورێكخراوێن مرۆڤایه‌تی تایبه‌تی رێكخراوێن خێرخوازی یێن فره‌نسی وئه‌لمانی پێشكێش دكه‌ن ل ناڤ وده‌رڤه‌ی كه‌مپا وخوه‌جهێن پارێزگه‌هێ هاته كرن.
پارێزگه‌رێ دهۆكێ خوشحالیا خوه ب سه‌ره‌دانێ دیاركر وبناڤێ پارێزگه‌هێ سوپاسیا هه‌لویستێن فره‌نسا وئه‌لمانیا كر ل دۆر وان هاریكاریێن پێشكێشكرین دوارێ سیاسی وله‌شكری ومرۆڤایه‌تی دا هه‌ر ژ ده‌ستپێكا په‌یدابوونا شه‌رێ داعشێ وقه‌یرانێن ئابووری ودارایی وژهه‌ر دو وه‌لاتان خواست ئاستێ هاریكاریێن خوه پتر لێ بكه‌ن بو وێ یه‌كێ هه‌رێما كوردستانێ ژوان قه‌یرانان ده‌ربازببیت.
