پارێزگه‌رێ دهۆكێ ژ كوێتێ:دێ بزاڤێ كه‌ين وه‌به‌رهێنه‌رێن بيانێ قانع بكه‌ين بهێنه كوردستانێ
ئه‌ڤرۆنيوز:
شانده‌كێ هه‌رێما كوردستانێ يێ پشكداره دكۆنگرێ ئاڤه‌دانكرنا عيراقێ دا كو ل رۆژێن 12 هه‌تا 14 ڤێ هه‌يڤێ ل كوێتێ دهێته ئه‌نجامدان ب پشكداريا پتر ژ 1300 كۆمپانيێن جيهانى ژ پتر ژ 40 وه‌لاتان، فه‌رهاد ئه‌مين پارێزگه‌رێ دهۆكێ وئه‌ندامێ شاندێ هه‌رێمێ دوى كۆنگره‌ى دا راگه‌هاند، پشكداريا كوردان دكۆنگرێ ئاڤه‌دانكرنا عيراقێ دا يا گرنگه چونكى هه‌تا نوكه ژى ئه‌م پشكه‌كين ژ عيراقێ وئه‌و فشارا كه‌فتيه سه‌ر عيراقێ ب تايبه‌تى پارێزگه‌ها نه‌ينه‌وا كو پايته‌ختا تيرۆرستێن داعشێ بوو كو فشارا وێ هه‌موو كه‌فته سه‌ر هه‌رێما كوردستانێ ب تايبه‌تى پارێزگه‌ها دهۆكێ وهه‌ولێرێ، ژبه‌ر هندێ ژى يا فه‌ره ئه‌م بۆ خه‌لكى دياركه‌ين كو هه‌رێما كوردستانێ نێزيكى دو مليۆن ئاوارێن عيراقى ژ هه‌موو پارێزگه‌هێن عيراقێ حه‌واندن وهه‌روه‌سا فشاره‌كا مه‌زن كه‌فته سه‌ر ژێرخانا ئابوورى يا هه‌رێما كوردستانێ ب تايبه‌تى دهۆكێ وپارێزگه‌هێن دى ژى”.
پارێزگه‌رێ دهۆكێ زێده‌تر بۆ كوردستان 24 گۆت” ئه‌ڤرۆ ئه‌م ل ڤێرێ به‌رهه‌ڤبووين ژبۆ وێ چه‌ندێ كو بزاڤێ بكه‌ين كو دو تشت تێدا هه‌نه هاريكارى وپشته‌ڤانيا عيراقێ بهێته كرن وديسا وه‌به‌رهينانه ژى كو كۆمپانيێن جيهانێ ووه‌لاتێن عه‌ره‌بى تێدا دپشكدارن وپێدڤيه ژينگه‌هه‌كا وه‌سا بهێته دروستكرن كو وه‌به‌رهێنان ل عيراقێ بهێته كرن، ئه‌م ژى وه‌كو هه‌رێما كوردستانێ پێدڤيه مفاى ژ ڤێ چه‌ندێ وه‌رگرين، ب راستى ژى ئه‌و تشتێ هاتيه به‌رهه‌ڤكرن وئه‌و پلانا هاتيه دانان، جهێ داخێ يه بێژين ديسا عيراقێ گه‌له‌ك كوردستان تێدا پشكدار نه‌كريه وئه‌م دێ بزاڤێ كه‌ين هه‌كه تشته‌ك بهێته كرن ئه‌م پشكا هه‌رێما كوردستانێ دابين بكه‌ين وبزاڤێ بكه‌ين ژى باوه‌ريێ بۆ وه‌به‌رهێنه‌رێن بيانى دروست بكه‌ين كو باشترين ژينگه‌ه بۆ وه‌به‌رهێنانێ ل عيراقێ ژينگه‌ها هه‌رێما كوردستانێ يه”.
دياركر ژى”مه دڤێت ئه‌م ب رێيا ڤان جۆره پشكداريان ب هه‌ڤكارى ل گه‌ل حوكمه‌تا عيراقێ ئه‌م دوپات بكه‌ين كو نوكه ئه‌م دبه‌رهه‌ڤين ئه‌ركێن خوه يێن دستوورى بجهبينين، يا ماى ل سه‌ر عيراقێ كو ئه‌وژى ئه‌ركێن خوه بجهبينيت، ل پێنج هه‌يڤێن بۆرى حوكمه‌تا هه‌رێمێا كوردستانێ ب تايبه‌تى سه‌رۆك وه‌زيرێن هه‌رێمێ بزاڤ كرينه بۆ خه‌لكه‌كى دووپات بكه‌ن كو هه‌رێما كوردستانێ يا ئاشتيخوازه ومه دڤێتن ئه‌م پشكه‌ك بين ژ عيراقێ، به‌لێ مافێن كوردستانێ يێن دستوورى بهێنه بجهئينان وهه‌كه ئه‌و ماف هاتبانه بجهئينان، ئه‌م نه‌د گه‌هشتينه ئه‌ڤرۆ، ئه‌ڤه ژى ئێك ژوان بابه‌تانه كو بزاڤێ بكه‌ين بۆ خه‌لكى دووپات بكه‌ين، ئه‌م دێ هه‌ر چينه پێش ژبۆ هندێ ئه‌م مافێن خوه يێن دستوورى بده‌ست خوه‌ڤه بينين، به‌لێ جهێ داخێ يه هه‌تا نوكه عيراق ب وى ره‌نگى نه‌هاتيه پێش بۆ نموونه بودجه ومووچێن خه‌لكى نه‌هاتيه وه‌رگرتن، به‌لێ دسه‌ر هندێ را مه گۆت ئه‌م دێ ل ڤێرێ به‌رهه‌ڤ بين ژبۆ هندێ كو ئه‌م ڤان ئه‌ركان گه‌ره‌نتى بكه‌ين”.
ل دۆر پرۆژێن عيراقێ به‌رچاڤ كرين بهێنه ئه‌نجامدان كو چو پرۆژه ژوان ل هه‌رێما كوردستانێ نينن، هه‌رچه‌نده وه‌زيرێ ده‌رڤه يێ كوێتێ گۆتبوو كو دێ هه‌موو عيراقێ ڤه‌گريت، ئايا دێ چه‌نده پرۆژه ب دروستى هه‌رێما كوردستانێ ڤه‌گرن، فه‌رهاد ئه‌مينى گۆت” وه‌كو پلان هه‌موو عيراق يا ڤه‌گرتى وپرۆژه ل هه‌رێما كوردستانێ ژى يێن هه‌ين، وه‌كو من گۆتى دو پشكان بخوه‌ڤه دگريت وه‌به‌رهێنانه وقه‌رزن بۆ عيراقێ، به‌لێ هه‌تا نوكه چو يا ديار نينه، دێ مينيت وه‌به‌رهێنان كو دێ مينيت ل سه‌ر هندێ كا ئه‌م دێ چه‌ند شێين وه‌به‌رهێنه‌رێ بيانى قانع بكه‌ين كو ل كوردستانێ وه‌به‌رهێنانێ بكه‌ت، به‌لێ ئه‌و راپۆرتا هاتيه دروستكرن، ئه‌ز نزانم چه‌ند دێ كارتێكرنێ كه‌ت، به‌لێ ئه‌و راپۆرتا ل به‌ر ده‌ست كو هاتيه دروستكرن پرۆژێن ستراتيژى ل هه‌رێما كوردستانێ نه‌داناينه، به‌لكو هنده‌ك پرۆژێن بچووكن ل هه‌وليرێ ودهۆكێ وسلێمانيێ وپرۆژێن هه‌ره مه‌زن بۆ ده‌ڤه‌رێن دى يێن عيراقێ هاتينه دانان وئه‌ڤه جهێ داخێ يه، به‌لێ ئه‌م ژى ل ڤێرێ به‌رهه‌ڤبووين دا بۆ خه‌لكى دووپات بكه‌ين كو ئه‌م دپێگيرين ب دستوورێ عيراقێ”.
