پارێزگه‌ها دھۆکێ خەلاتێ رێزلینانێ پێشکێشی دو رێکخراوان کر
ئه‌ڤرۆنيوز:
ژبۆ بتر ھاماھەنگی و پشتەڤانیکرنا رێکخراوێن کار و خزمەتان پێشکێشی ئاواران و پەنابەران دکەن، ئیسماعیل محمەد، ھاریکارێ پارێزگارێ دھۆکێ بۆ کاروبارێن ئاواران و پەنابەران و ب ئامادەبوونا ئەدریس نەبی صالح رێڤەبەرێ جێبەجێ کار یێ بۆردێ کاروبارێن مرۆڤایەتی BRHA ل بارەگایێ بۆردی خەلاتێ رێزلینانێ ژ بال پارێزگەھا دھۆکێ ڤە ئاراستەی ھەردو رێکخراوان GRC و Syrian relief کر.
ل دەستپێکێ خەلاتێ رێزلینانی بۆ ھیلین نافع رێکخه‌را رێکخراوا خاچا سۆرا ئەلمانی GRC ھاتە کرن ژبەر رۆلێ رێکخراوا ناڤبری دبیاڤێ گەھاندنا ھاریکاریان بۆ ئاواران و پەنابەران و خەلکێ خوه‌جهێ پارێزگەھێ، پاشی خەلاتێ رێزلینانێ بۆ ھڤال سلیمان تاھر ریڤەبەرێ رێکخراوا Syrian relief ل دھۆکێ ھاته کرن ژبەر رۆلێ وان دبیاڤێ گەھاندنا ھاریکاریان بۆ ئاواران و پەنابەران.
دپەیڤەکێ دا هاريكارێ پارێزگه‌رێ دهۆكێ سۆپاسیا ھەردو رێکخراوان کر ژبەر وان خزمەتێن پێشکێش دکەن ل ناڤ ئاواران و پەنابەران و خەلکێ خوه‌جهيێ پارێزگەھێ، دیسان داخواز کر ھەردو رێکخراو د بەردەوام بن ل سەر کارێ خوه وپتر بزاڤا گرنگيێ ب ئەنجامدانا پرۆژێن پەیداکرنا دەلیڤێن کار بدەن پێخەمەت بتر خوه‌شکرنا ژیارا ئاواران و پەنابەران و خەلکێ خوه‌جهێ پارێزگەھا دھۆکێ.