“پارێزگەرێ کەرکووکێ بلا یێ مەمنون بیت نادەینە دادگەھێ و حوکم ببیت”
ئەڤرۆ نیوز:
پارێزگەرێ کەرکووکێ دکونگرەکێ رۆژنامەڤانی دا ل کەرکووکێ رەخنە ل پەرلەمانتارێن کورد ل بەغدا گرتن کو وان بەرگری ژ مافێن پێشمەرگەی نەکریە، بڕیاردەرێ لژنا ئاسایش و بەرگریێ ل جڤاتا نوونەرێن عیراقێ د بەرسڤدانا ویدا دبیژیت، بلا پارێزگەرێ کەرکووکێ بھێتە جھێ من و مافێن پێشمەرگەی بدەستڤە بینیت.
نەجمەدین کەریم پارێزگەرێ کەرکووکێ د وی کونگرێ رۆژنامەڤانی دا گۆتبوو” ھندەک قانوون یێن ھەین کو ئیمتیازاتێن تایبەت ددەنە ھێزێن عیراقی و حەشد شەعبی و ئەو ئیمتیازات ژ پێشمەرگەی ناگرن و ئەڤە نە دادپەروەریە بەرامبەر پێشمەرگەی و قوربانیێن وان” پارێزگەرێ کەرکووکێ خویاکربوو ژی کو وی نڤیسارەک ئاراستەی بەغدا کربوو و تێدا داخوازکربوو کو پێشمەرگە نەھێتە بێ بەھرکرن ژ وان ئیمتیازاتان، بەلێ حوکمەتا بەغدا بەرسڤا من دابوو کو ئەو بریارە ل جڤاتا نوونەرێن عیراقێ ھاتبوو دەرکرن و ھەوە نوونەر یێن ل وێرێ ھەین و وان چو نەرازیبوون ل سەر وێ چەندێ نەبوو”. دیارکرژی” پەرلەمانتارێن کورد ل دۆر وێ پرسێدبێ دەنگ بوون و دھندەک پرسێن دی یێن بچووک دا نەچوونە د ھۆلا پەرلەمانی ڤە و بەغدا بجە ھێلا”.
شاخەوان عەبدولا بریاردەرێ لژنا ئسایشێ و بەرگریێ ل جڤاتا نوونەرێن عیراقێ ژ لیستا پارتی دداخۆیانیەکێ دا بۆ رۆژناما ئەڤرۆ بەرسڤا پارێزگەرێ کەرکووکێ دا و گۆت” مە وەکو پەرلەمانتارێن کورد ل جڤاتا نوونەرێن عیراقێ ئیمزا کۆمکربوون بۆ وێ چەندێ کو بریارا بڕینا 3% ژمووچێ فەرمانبەرێن عیراقێ ژ پێشمەرگەی ژی بگریت، ددەمێ دەنگدانێ دا ژبەرکو رێژا پەرلەمانتارێن کورد 20% یە، دەنگدانا مە سەر نەگرت بۆ وی بابەتی”.
شاخاوانی زێدەتر گۆت” ئەز بۆ پارێزگەرێ کەرکووکێ پێشنیار دکەم ئەو بھێتە جھێ من و ئەز بچمە جھێ وی، بەلێ ئەو بشێت مافێن پێشمەرگەی بدەستڤە بینیت و ئەز ژی بشێم عەرەبێن ھاوردە ژ کەرکووکێ دەربکەم و کەرکووکێ بێخمە سەر کوردستانێ ڤە”.
شاخەوانی رەخنە ل پارێزگەرێ کەرکووکێ گرتن و گۆت” باشە وی بۆ کەرکووکێ چ کریە؟ ھەر چ گەندەلیا ل کەرکووکێ بووی، ل سەردەمێ وی بوو، ھەر چ عەرەبێن جارەکادی ھاتینە کەرکووکێ ھەر ل سەردەمی وی ھاتبوون و ھەموو قونتەراتێن کەرکووکێ تنێ بۆ چار کەسان بوون و دونیایەکا پاران یێن ھاتینە مەزاختن و باژێرەکێ وێرانە، ما یێ مەمنون نینە ژبەر وێ چەندێ نادەینە دادگەھێ و بھێتە حوکمکرن؟”.
ل دۆر بڕینا رێژا 3% ژ مووچێ فەرمانبەرێن عیراقێ بۆ حەشد شەعبی، شاخەوانی گۆت” مە داخواز کر پێشمەرگەی ژی پشک دوێ رێژێ دا ھەبیت، بەلێ حوکمەتا بەغدا دبێژیت پێدڤیە ژلایێ حوکمەتا ھەرێمێ بۆ پێشمەرگەی بھێتە مەزاختن”.
خویاکر ژی” ژبەرکو پارێزگەھا کەرکووکێ ب سەر بەغدا ڤەیە، پێدڤی بوو ئەو بریارە ب جە نەئینابا و پارێزگەرێ کەرکووکێ دشیا رێژا 3% ژ مووچێن فەرمانبەرێن کەرکووکێ نەھاتبا بڕین، یان دشیا بریارەکێ دەربکەت وتێدا دیاربکەت ژبەرکو پێشمەرگە سنۆرێن کەرکووکێ دپارێزیت، 3% ژ مووچێ فەرمانبەرێن پارێزگەھا کەرکووکێ بۆ پێشمەرگەی بھێتە مەزاختن نەکو بۆ حەشد شەعبی”.
