پارێزگەھا دھۆکێ دێ سالڤەگەرا داگیرکرنا شنگالێ ساخکەت
ئه‌ڤرۆ نيوز:
ل بیرەوەریا ئێکێ یا سالڤەگەرا جینۆسایدا شنگالێ ژ لایێ تیرۆرستێن داعش ڤە، کارگێریا پارێزگەھێ ل ژێر درووشمێ (بوویەرێن شنگالێ بەردەوامیا جینۆسایدا کوردانە) ب ھژمارەکا چالاکی و پەیامان دێ ب ساخکرنا ڤێ بیرەوەریێ رابیت.
حەمزە رەزیکی، سەرۆکێ لژنا بیرەوەریا سالڤەگەرا کارەساتا شنگالێ ل پارێزگەھا دھۆکێ بۆ ئەڤرۆ دیار کر، ب پشتەڤانیا کارگێریا پارێزگەھێ بڕیارە ل رۆژا ٣-٨-٢٠١٥ و ب ھەلکەفتا بۆرینا سالەکێ ل سەر جینۆسایدا شنگالێ، ل دەمژمێر ١٠:٣٠ سپێدێ ل ھۆلا کۆنگران، ب ڤەکرنا پێشانگەھەکا شێوەکاری دێ دەست پێ کەت و گۆت: “ژ بلی لایەنێن پەیوەندیدار یێن حوکمەتا ھەرێما کوردستانێ، ھژمارەکا قۆنسلخانە و رێکخراوێن بیانی بۆ پشکداریکرنێ تێدا ھاتینە داخوازکرن، دا کو بوویەر ب شێوەکێ بەرچاڤتر بۆ ھەموو مرۆڤ دوستان دیار بن و دەنگێ خەلکێ زیانڤێکەفتی بگەھیتە جیھانێ”.
رەزیکی خویا ژی کر، ب رێیا دکیۆمێنت و پەیامێن ئۆلی، داخواز ژ جڤاکێ نێڤدەولەتی دێ ھێتە کرن، کارەساتا شنگالێ ب جینۆساید بھێتە نیاسین و گۆت:”ھژمارەکا زارۆیێن بووینە قۆربانی و د وێ کارەساتێ دا بێ دایک و باب ماین، پەیامێن خوە یێن تایبەت دێ ھەبن”.
ھەر ل دۆر بابەتی نایف سەیدۆ، رێڤەبەرێ ناحیا سنوونێ بۆ ئەڤرۆ ئاشکرا کر، ئەو ب ھەلکەفتا جینۆسایدا شنگالێ دێ بەیاننامەکێ بەلاڤکەن بۆ ھەموو لایەنێن پەیوەندیدار یێن ناڤخوەیی و نێڤدەولەتی بلند کەن و گۆت: “مەزنترین داخوازێن خەلکێ شنگالێ د سالڤەگەرا ئێکێ یا کارەساتا شنگالێ دا، ئەوە کچ و ژن و زارۆیێن رەڤاندی بھێنە رزگارکرن”.
رۆژا دوشەمبیا بھێت کو دبیتە ٣-٨-٢٠١٥ دبیتە سالڤەگەرا ئێکێ یا جینۆسایکرنا شنگالێ ب دەستێن تیرۆرستێن داعش و تێدا ھژمارەکا مەزن یا خەلکێ بێگونەە بوونە قۆربانیێن تیرۆرێ.
