پارێ سه‌رپێچيێن هاتنوچوونێ دێ بيته قست
ئه‌ڤرۆ نيوز:
وه‌زاره‌تا ناڤخۆ داخواز ژ حوكمه‌تا هه‌رێما كوردستانێ كريه كو كاودانێن نوكه يێن وه‌لاتيان به‌رچاڤ وه‌ربگريت و سزايێ سه‌رپێچيێن هاتنوچوونێ بكه‌ته قستێ هه‌يڤانه و جڤاتا وه‌زيران ره‌زامه‌ندى ده‌ربڕيه.
كه‌ريم شنگالى وه‌زيرێ ناڤخۆيێ حوكمه‌تا هه‌رێما كوردستانێ بۆ رۆژناما هه‌ولێر راگه‌هاند كو ب فه‌رمى داخواز ژ حوكمه‌تێ كريه كو كاودانێن نوكه يێن هه‌رێما كوردستانێ و ره‌وشا ژيارا وه‌لاتيان و ئه‌و قه‌يرانا دارايى يا روو ب روويێ خه‌لكى بووى به‌رچاڤ بهێته وه‌گرتن و سزايێ كاميرێن هاتنوچوونێ ببيته قستێ هه‌يڤانه.
شنگالى گۆت: “ئه‌ڤ كێشه ب تنێ ب ڤێ ميكانيزمێ دشيان دايه بهێته چاره‌كرن و وه‌لاتى سه‌رپێچيێن هاتنوچوونێ ب ره‌نگێ قستێ هه‌يڤانه بده‌ن”، ئه‌ڤ بڕياره دێ ب رێيا رێنمايه‌كا نوو هێته په‌يره‌وكرن و دێ ب گۆره‌ى زۆريا سه‌رپێچيا بيت.
وه‌زيرێ ناڤخۆ دا زانين كو ل رۆژا پێنجشه‌مبيا بۆرى 25ى ته‌باخا 2016ێ ل جڤاتا وه‌زيران گه‌هشتيه قووناغا دووماهيێ و وه‌كو پره‌نسيپ بڕيار دايه، ب ڤان نێزيكان دێ كه‌ڤيته وارێ بجهئينانێ و چاڤه‌رێ ده‌ركه‌فتنا بڕيارێ نه.
