پارێ قەرەبوویا ئاھێن خوارنێ یێن ھەیڤانە دێ ھێنە خەرجکرن
ئەڤرۆ نيوز:
رێڤەبەرێ بەلاڤکرنا ئاھێن خوارنێ یێ ھەولێرێ ئاشکرا کر کو ھەر قەرەبوویەکا ئاھێن خوارنێ یێن فەوتی ژ ئالیێ بەغدا ڤە بریار ل سەر خەرجکرنا وان بھێتە دان دێ ھەرێما کوردستانێ ژی ڤەگریت و گۆت “د کڤانێ قەرەبووکرنێ دا پارێ پشکا شیرێ فەوتیێ زارۆیان ژی دێ ھێتە خەرجکرن”.
نەوزاد سابر رێڤەبەرێ بەلاڤکرنا ئاھێن خوارنێ یێ ھەولێرێ د داخویانیەکێ دا بۆ (باسنیوز) خویا کر کو نھا پارێ قەرەبوویا پشکا شیرێ زارۆیان ژ ئالیێ بەغدا ڤە بۆ ھەرێما کوردستانێ ھاتیە رەوانەکرن و پارە ژی دێ ب رێیا بریکاران ھێنە بەلاڤکرن و گۆت “ھەیڤانە دبیتە ١٤ ھزار و ٥٠٠ دینار و ئەڤ قەرەبوویە یا ھەیڤا دەھا سالا ٢٠١٤ یە، ئانکو ژ ئێکی ئادارا ٢٠١٤ێ دەست پێ دکەت ھەتا ٣١/کانوونا ئێکێ/٢٠١٤ ، ب ئاوایەکی ١٤ ھزار ٥٠٠ دینار بۆ قەرەبوویا ھەیڤانە یا ھەر زارۆیەکی ھاتیە دیارکرن”.
رێڤەبەرێ بەلاڤکرنا ئاھێن خوارنێ یێ ھەولێرێ تێکەست ژی کر کو ھەر قەرەبوویەکا ئاھێن خوارنێ یێن فەوتی ژ ئالیێ بەغدا ڤە بریار ل سەر خەرجکرنا وان بھێتە دان دێ ھەرێما کوردستانێ ژی ڤەگریت.
ھەژی گۆتنێ یە د سالا بۆری دا ھەر ئەندامێ خێزانەکێ کۆژمێ ١٧ ھزار دینار وەکو قەرەبوویا ئاھێن خوارنێ یێن فەوتی یێن شەش ھەیڤێن سالا ٢٠١٤ بۆ وەلاتیان خەرج کربوون و بۆ ھەرێما کوردستانێ ژی ھاتبوونە خەرجکرن.
