پارێ پەترۆلێ یێ ل تورکیا مای دێ بۆ مووچان بیت
ئەڤرۆ:
جێگرێ سەرۆکێ لیژنا سامانێن سروشتی ل پەرلەمانێ کوردستانێ رادگەھینیت، کۆژمەکێ پارەی یێ وێ پەترۆلا ھەرێمێ فرۆتی ل تورکیا مایە و بڕیارە ب ڤەگەریننە ھەرێمێ، دا کو مووچێ فەرمانبەران پێ بھێتە دان.
دلشاد شەعبان، جێگرێ سەرۆکێ لیژنا سامانێن سروشتی ل پەرلەمانێ کوردستانێ دیار کر، کۆژمەکێ پارەی یێ وێ پەترۆلا ھاتیە فرۆتن یا ھەرێما کوردستانێ ل تورکیا مایە و گۆت: “ب دروستی ئەز نزانم ئەو پارە چەندە، لێ گەلەکە و ل (ھالک بانک) ھاتیە ھەلگرتن، دڤێت ئەو پارە ب ھەرێما کوردستانێ بھێتە دان، چونکو مافێ ھەرێمێ یە و د نوکە دا مە پێدڤی ب وی پارەی ھەیە”.
ئاشکرا ژی کر، دھێتە چاڤەرێکرن، ڤان نێزیکان ئەو پارە ل ھالک بانکا تورکیا بێخنە سەر حسابا بانکا ھەرێما کوردستانێ و دانا مووچان و مەزاختیێن دی بھێتە ب کارئینان و گۆت “ژ بەر کو بەغدا مووچە و بۆدجا ھەرێما کوردستانێ یێن سالا ٢٠١٤ نەھنارتینە، لەو داھاتێ پەترۆلا ھەرێمێ بۆ دانا مووچان ھاتیە مەزاختن”.
ل ٢٢/٥/٢٠١٤ ھەتا دوماھیا وێ سالێ، ھەرێما کوردستانێ ب رەنگەکێ فەرمی پەترۆلا خوە ب رێیا تورکیا بۆ بازارێن جیھانێ ھنارتیە، د وی دەمی ژی دا ٤٢ کەشتیێن بارھەلگرێن پەترۆلێ فرۆتینە و داھاتێ وێ ژی نێزیکی سێ ملیار دۆلاران بوویە و ل بانکەکا تورکیا ھاتیە ھەلگرتن، حوکمەتا ھەرێمێ ژی پشکەکا وی پارەی وەرگرتیە و بۆ دانا مووچێ فەرمانبەران مەزاختیە.
