پارێ گه‌نمێ جوتيارێن دهۆكێ گه‌هشت
ئه‌ڤرۆنيوز:
ئه‌ندامه‌كێ په‌رله‌مانێ كوردستانێ راگه‌هاند، پشتى بريارا خه‌رجكرنا چه‌كێ پارێ گه‌نمێ جوتيارێن هه‌رێما كوردستانێ بۆ سالا 2017 هاتيه دان، ئه‌ڤرۆ به‌هرا دهۆكێ گه‌هشت.
زياد حسێن ئه‌ندامێ په‌رله‌مانێ كوردستانێ ژ فراكسيۆنا پارتى وئه‌ندامێ لژنا چاندنێ يا په‌رله‌مانى گۆت” پشتى حوكمه‌تا عيراقێ بريارا خه‌رجكرنا هه‌موو پارێ جوتيارێن هه‌رێما كوردستانێ بۆ هه‌يڤا 8 سالا 2017 ده‌ركرى، ئه‌ڤرۆ ئێكشه‌مبى چه‌كێ پارێ دهۆكێ گه‌هشت كو دبيته 18 مليار و400 مليۆن دينار”.
زيادى بۆ مالپه‌رێ فه‌رميێ پارتى زێده‌تر گۆت ” ئه‌و پارێ ئه‌ڤرۆ گه‌هشتى، تمامكه‌رێ پارێ نه‌هاتيه دان يێ سالا 2017 كو نێزيكى 60 مليار دينارێن هه‌موو جوتيارێن هه‌رێما كوردستانێ يه كو نه‌هاتيه دان”.
خوياكر” چه‌كێ پارێ جوتيارێن هه‌ولێرێ وسلێمانيێ ژى دێ هێته هنارتن، چونكى بريارا خه‌رجكرنا هه‌موو پاره‌ى يا هاتيه دان ودچه‌ند رۆژێن داهاتى دا دێ گه‌هيت”.
خه‌رجكرنا پارێ گه‌نمێ جوتيارێن هه‌رێما كوردستانێ بۆ سالا 2017 ژلايێ حوكمه‌تا عيراقێ ڤه دده‌مه‌كى دايه كو هه‌تا نوكه جوتيارێن هه‌ريمێ پارێ سێ سالێن بۆرى (2014 و2015) وپشكه‌كێ سالا 2016 ب تمامى پێ نه‌هاتيه دان ول ده‌ف حوكمه‌تا عيراقێ مايه.
