پارێ 25 ھزاری نه‌ما
ئەڤرۆ نیوز:
ل بازارێ دھۆکێ دیاردا کێمبوونا پارێ 25 ھزاری یا بەرچاڤ دبیت ، پارە گوھوڕ ڤێ چەندێ پشت راست دکەن و ئابوورناس ژی ڤێ چەندێ بۆ نە باوەریا وەلاتیان ب بانکان ڤەدگەرینن.
شڤان سەعید ل بازارێ پارە گوھۆڕان بۆ ڕۆژناما ئەڤرۆ گوت” ئەڤە سێ ھەیڤە خواستن ل سەر پارێ 25 ھزاری یا زێدەبووی و ب دیتنا من ئەڤ پارە پتر یێ چوویە وەلاتێ تورکی، دیسا زێدەبوونا خواستنا خەلکی ل سەر ڤی پارەی وێ چەندێ دگەھینت کو خەلکێ وی پارەی ڕادکەت”.
رەمەزان عومەر سلێڤانەی، بەرپرسێ لژنا پارە گوھۆڕان، بۆچوونەکا جوداتر ھەبوو، بۆ ئەڤرۆ گۆت” کێمبوونا پارێ 25 ھزاری گرێدای قەیرانێ نینە و کێمبوونا وی بۆ وێ چەندێ ڤەدگەریت دەمێ دۆلار ل بەغدا دھێتە فرۆتن، بازرگان پتر پارێ 25 ھزاری بکاردئینن بۆ ڤەگوھاستنێ بۆ بەغدا و بۆ ھەلگرتنێ یێ ب ساناھی ترە، ھەکە پارێ50 ھزاری بھێتە دبازاری دا، دبینم خەلک ئێدی دێ وی ڕاکەت و پارێ دی نا ڕاکەت، ب تنێ ئەڤەیە ھوکارێ کێمبوونا وی پارەی ب دیتنا من”.
ھەمبەر برنا ڤی پارەی بۆ وەلاتێ تورکیا، ناڤبری گۆت” ھەتا ل بازاری ژی، پارێ گڕ وەکو 25 ھزاری خەلکی پتر حەز یا ل سەر وی ھەی و ئەڤە بۆ ھەلگرتنێ و قەبارێ پارەی ڤەدگەریت “.
د.خەلیل غازی بسپۆرێ ئابووری و مامۆستایێ زانکۆیێ، ل دۆر ڤێ پرسێ بۆ ئەڤرۆ دیارکر کو ئەڤ پارە بازرگانان و خەلکی بۆ خوە یێن ھەلگرتین، بەلێ ئەڤە ب مەترسی نەدیت کو روودانێن سالێن نۆتان دووبارە ببن و دەم پێ دڤێت ھەتاکو حوکمەت ڤی پارە ژ کارکرنێ بێخیت و ئێدی خەلک زەرەمەندبیت، چونکی بۆ ھەر گوھۆڕینەکێ، دڤێت قانوون و پەرلەمان دەنگی ل سەر بدەت.
د.خەلیلی ھێشتا گۆت” خەلکی باوەری ب بانکان نینە و پارێ خوە یێ بریە مال و یێ ڤەشارتی و ئەڤە ژی ھوکارەکە کو بزاڤا کرین و فرۆتنێ ل بازاری نینە، ھەکە باوەری ھەبا، حوکمەت دشیا سەنەداتا ب فرۆشیت و قەران ژ وەلاتیان وەربگریت و دشیا مووچان ژی بدەت”.
د.خالد حەیدەر ھاریکارێ سەرۆکێ زانکۆیا سلێمانیێ ل دۆر ڤی بابەتی بۆ ئەڤرۆ گۆت” چو جوداھی د ناڤبەرا پارێ گر و یێ دی دا نینە و ھەتا بۆ گوھۆڕینێ ژی، نابینم جوداھی ھەیە و دبینم ژ 10 ھزار دۆلاران، تنێ دو ھەتا سێ ھزار دیناران جوداھی ھەبیت، دیسا ڤی بابەتی گرێدان نینە ب مفایێ ب تنێ ھەکە بۆ ھەلگرتنێ خوەشتر بن” .
خالدی ھێشتا گۆت” دیسا ئەڤێ چەندێ پەیوەندی ب بازرگانان ڤە یا ھەی و تایبەت ھەر دو وەلاتێن تورکیا و ئیرانێ و ئینانا کەلوپەلان و پارێ گڕ وەک 25 ھزاری دێ خوەشتر بیت بۆ ھەلگرتنێ و ڤەگوھاستنێ، لێ دناڤ خوە دا نابینم ڕۆل ھەبیت”.
د.خالد حەیدەر گۆت ژی” بەری سالا 2003 ێ، حوکمەتا بەعس پارە کوپی دکر، چونکی باوەری ب پاران نەبوو، وی دەمی ژی ئەو پارێ ل کوردستانێ مامەلە پێ دھاتەکرن پارێ عیراقی یێ چاپا سویسری بوو و بھایێ وی یێ گرانتر بوو ژ پارێ ل بەغدا دھاتە کوپیکرن”.
