پارە ل سەر کەس و کارێن شەھید و بریندارێن شەڕێ داعش دێ ھێتە بەلافکرن
ئەڤرۆ نیوز:
وەزیرێ پێشمەرگەی ب وەکالەت بڕیاردایە، لژنەیێن بەلاڤکرنا ھاریکاریان ل سەر خێزانێن شەھید و بریندارێن شەڕێ دژی تیرۆرستێن داعش لەزێ ل بەلاڤکرنا ھاریکاریان بکەن داکو ل دەمەکێ نێزیک ھەموو خێزانێن شەھیدان پێنج ملیۆن دیناران وەرگرن، ئەندامەکێ لژنا کاروبارێن پێشمەرگەی گۆت: ” وەزارەت مەزاختیێن چارەکرنا برینداران دێ بەلافکەت”.
قادر رەزگەیی، ئەندامێ لژنا کاروبارێن پێشمەرگەی ل پەرلەمانێ کوردستانێ بۆ رۆژناما ئەڤرۆ دیار کر کو لژنا پێشمەرگەی سەرەدانا وەزیرێ پێشمەرگەی ب وەکالەت کریە و تێدا بەحسێ چەندین پرسان کریە، ژوان پێدانا ھاریکاریان ل سەر خێزانێن شەھید و برینداران شەڕێ داعش و گۆت: ” وەزیری سۆزدایە کو پێداچوونێ د ڤی بابەتی دا بکەت داکو لژنێن بەلاڤکرنا ھاریکاریان زێدەتر کاربکەن و ل دەمەکێ نێزیک پێنج ملیۆن دیناران وەکو ھاریکاری بۆ خێزانا ھەر شەھیدەکی ب مەزێخن و سەرەرایی ڤێ چەندێ ھژمارەکا زۆرا بریندارێن شەڕێ دژی تیرۆرستێن داعش ھاریکاریا وەزارەتێ وەرنەگرتیە ژبەر ڤێ چەندێ ل دەمەکێ نێزیک ھاریکاری دێ ل سەر وان برینداران ژی ھێنە بەلاڤکرن”.
ناڤھاتی ئاماژە دا وێ چەندێ کو بڕیاربوو ب مەرەما چارەکرنێ ھژمارەکا پێشمەرگێن بریندار بچنە دەرڤەی وەلاتی، بەلێ ھەتا نوکە نەھاتینە ھنارتن ژبەر ڤێ چەندێ بڕیار ھاتیەدان ل دەمەکێ نێزیک ئەڤ پێشمەرگێن بریندار ب رێیا وەزارەتێ بچنە دەرڤەی وەلاتی و گۆت: “ھژمارەکا پێشمەرگێن بریندار بۆ چارەکرنێ خوە ل ھیڤیا وەزارەتێ نەگرتیە و ل نەخۆشخانێن تایبەتێن ھەرێمێ چارەکرنا خوە کریە ژبەر ڤێ چەندێ وەزارەت دێ مەزاختیێن وان یێن نەخوەشخانێ مەزێخیت”.
