پاشەکەفتکرنا مووچێ پێشمەرگەی دێ ھێتە راکرن
ئه‌ڤرۆ نيوز:
سەرۆکا لیژنا پێشمەرگەی ل پەرلەمانێ کوردستانێ ئاماژە ب ڤێ چەندێ دکەت کو ھەکە پڕۆژێ چاکسازیێ بھێتە ب جھئینان دێ پاشەکەفت ل سەر مووچێ پێشمەرگەی ھێتە کێمکرن و یان ژی ھەر نامینیت و دبێژیت: بزاڤێن ئێکگرتنا ھێزێن پێشمەرگەیژی دەستپێکریە.
شیلان جەعفەر، سەرۆکا لیژنا پێشمەرگەی ل پەرلەمانێ کوردستانێ بۆ رۆژناما ئەڤرۆ گۆت: “بزاڤێن مە د بەردەوامن بۆ ڤەگەڕاندنا مووچێ پێشمەرگەی بێی پاشەکەفت، حوکمەتێ پڕۆژێ چاکسازیێ بەرھەڤکریە و خواندنا ئێکێ بۆ ھاتیەکرن، لیژنێن پەرلەمانی ل سەر کارێ خوە دبەردەوامن، مە سەرەدانا وەزارەتا پێشمەرگەی ژی کریە بۆ ڤێ مەرەمێ ب جھئینانا پڕۆژێ چاکسازیێ دێ داھاتەکێ زۆر بۆ حوکمەتێ ڤەگەڕینیت و دوبارە ئەو داھاتێ زێدە دبیت دێ ل سەر مووچێ وان تەخێن پێدڤیە پاشکەفتکرن ل سەر مووچێ وان بھێتە راکرن؛ ھێتە بەلاڤکرن”.
شیلان خانێ گۆتژی: “بزاڤێن مە بۆ چاڤدێریکرنا ئێکگرتنا ھێزێن پێشمەرگەی ژی دبەردەوامن، وەزارەتێ بخوە پڕۆژەکێ چاکسازیێ ھەیە و رێڤەبەرایەتیەک بۆ ڤێ مەرەمێ ھاتیە پێکئینان، لەوڕا کار یێ بەردەوامە و رۆژێن بۆری ژی دو لیوایێن پیادە ھاتنە رێکخستن کو پشتی روودانێن داگیرکرنا کەرکووکێ ژێکڤە ببوون”.
