پانزینا بازرگانی بێ بڕیارا حوکمەتێ ئەرزان دبیت

ئەڤرۆ نیوز:
رێڤەبەرێ بەلاڤکرنا بەرھەمێن گازێ ل پارێزگەھا دھۆکێ بۆ ئەڤرۆ دیار کر کو ھەڤرکی د ناڤبەرا بازرگانێن ئینانا پانزینێ دا یا چێبووی، لەو بھایی پانزینێ یێ ئەرزان دبیت، نوکە ل ھندەک وێستگەھێن پارێزگەھا دھۆکێ لێترا پانزینێ ب 650 دیناران دھێتە فرۆتن.
یوسف نوری سەعدواللە، رێڤەبەرێ بەلاڤکرنا بەرھەمێن گازێ ل پارێزگەھا دھۆکێ ئاشکرا کر، نوکە لترا پانزینا حکومی ھەر ب 700 دیناران دھێتە فرۆتن، لێ ئەو پانزینا ئەرزان ل وێستگەھان دھێتە فروتن یا بازرگانی یە و ھەر ل دووڤ سالوخەتێن یا حکومی یە و پانزینەکا گەلەک باشە و گۆت: “چو پانزینخانە نەشێن پانزینا پیس بفرۆشن، چونکو وەلاتی ژێ ناکرن و کارێ وان نابیت، لەو خودانێن پانزینخانا ژی بزاڤێ دکەن پانزینا پیس نەفرۆشن، دەمێ ئەو پانزینا پاقژ و ل دووڤ سالوخەتان دفرۆشن پتر د مفادارن و رێژەکا پتر یا پانزینێ دفرۆشن”.
یوسف نوری خویا ژی کر، وان چو پەیوەندی ب بھایێ پانزینا بازرگانی ڤە نینە، نوکە ژبەر ھەبوونا ھەڤرکیێ یا ئەرزان دبیت و گۆت: “ئەم د گەل ھندێ داینە پانزین ھێشتا ئەرزان بیت، ژ بەر کو خەلک دێ پتر مفادار ژێ بن، بەردەوام دووڤچوون ل سەر پانزینێ دھێتە کرن، ھەر پانزینخانەکا پانزینا پیس بفرۆشیت پیرابوون د گەل دا دھێنە کرن”.
عەبدولسەمەد تێلی، سەرۆکێ لژنا سۆتەمەنیێ ل جڤاتا پارێزگەھا دھۆکێ بۆ ئەڤرۆ ئاشکرا کر، ژ سەرجەمێ 140 وێستگەھێن پاریزگەھا دھۆکێ، نوکە نیڤەکا وان پانزینا بازرگانی دفرۆشن ب بھایەکێ ئەرزانتر ژ یا حکومی و گۆت: “ئەرزان بوونا بھایێ پانزینا بازرگانی بۆ وێ چەندێ دزڤریت، نوکە ھەڤرکی د ناڤبەرا بازرگانێن ئینانا پانزینێ دا دروستبوویە، ھەر بازرگانەک حەز دکەت پتر پانزینێ بینیت و بفرۆشیت”.
گۆتژی” “پانزینا بازرگانی ژی کوالێتیا وێ گەلەک یا باشە و ھەر وەکو یا حکومی یە”.

کۆمێنتا تە