پتری حەفت ھزار کەسان ل ھەرێمێ توشی نەساخیا کۆلبوونا میلاکێ بووینە
ئەڤرۆ نيوز:
پەیڤدارێ وەزارەتا ساخلەمیێ ل حوکمەتا ھەرێما کوردستانێ ئاگەھداریا وەلاتیان دکەت ژ بەلاڤبوونا نەساخیا کۆلبوونا مێلاکێ و دیار کر، ل ھەرێمێ حەفت ھزار و ٥٠٠ کەس توشی ڤێ نەساخیێ بووینە و گۆت: “ئاریشا مەزن یا ڤێ نەساخیێ ژی ئەوە کو چ نیشان نینن”.
د. خالس قادر، پەیڤدارێ وەزارەتا ساخلەمیێ ل حوکمەتا ھەرێما کوردستانێ ئاشکرا کر، سێ جۆرێن نەساخیا کۆلبوونا مێلاکێ ھەنە، جۆرێ ئێکێ (A) و بۆ دەمەکی دھێتە چارەکرن، لێ جۆرێن (B و C) د مەترسیدارن و بۆ خەندان گۆت: “ئەڤ نەساخیە ب رێیا کارێ سێکسی، ب کارئینانا ئامیرێ ددان شووشتنێ، لێدانا دەرزیێ و وەرگرتنا خوینێ ژ کەسەکی بۆ کەسەکێ دی دھێتە ڤەگوھاستن”.
خویا ژی کر، نەساخیا کۆلبوونا مێلاکێ ل ھەموو وەلاتێن جیھانێ ھەیە، ل ھەرێما کوردستانێ ژی د نوکە دا حەفت ھزار و ٥٠٠ حالەتێن وێ ھاتینە تۆمارکرن و گۆت: “پێنج ھزار ژ وان حالەتان ژ جۆرێ (B) نە و دو ھزار و ٥٠٠ ژی ژ جۆرێ (C) نە”.
دەربارەی نیشانێن ڤێ نەساخیێ ژی پەیڤدارێ وەزارەتا ساخلەمیێ گۆت: “ئاریشا مەزن یا ڤێ نەساخیێ ئەوە، چ نیشان نینن، بەلکو ب تنێ ب رێیا پشکنینا خوینێ دھێتە زانین، دیسا ب بۆرینا دەمی چاڤ و پیستێ کەسێ توشبووی زەر دبن و ھندەک جاران ژی زکچوون و دلرابوون د گەل دا ھەیە، لێ یا ب مەترسی قووناغا پشتی ڤان نیشانایە کو پەنجەشێرا میلاکێ و پەککەفتنە”.
