پتری سێ ھزار ئێزدیان ژ دەستێن تیرۆرستێن داعش ھاتینە رزگارکرن
ئه‌ڤرۆ نيوز:
رێڤەبەرێ نڤیسینگەھا رزگارکرنا رەڤاندیێن ئێزدی ل دھۆکێ دیار کر کو ل دووڤ نووترێن ئامار ل جینوسایدا شنگالێ شەش ھزار و 417 کەس ھاتبوونە رەڤاندن ژ ھەر دو رەگەزان ژ وان ژی سێ ھزار و 548 کچ و ژن بوون و دو ھزار و 869 زارۆک و زەلام بووینە ھەتا نوکە سێ ھزار و 333 کەس ژ دەستێن تیرۆرستێن داعش رزگاربووینە و ھێشتا چارەنڤیسی زێدەتر ژ سێ ھزار کەسان د دەستێن تیرۆرستێن داعش دا مایە.
حسێن کورو قائیدی، رێڤەبەرێ نڤیسینگەھا رزگارکرنا رەڤاندیێن ئێزدی ل دھۆکێ سەر نڤیسینگەھا سەرۆکێ حوکمەتا ھەرێما کوردستانێ ڤە دیارکر کو ھەتا رۆژا 29-10-2018 نڤیسینگەھا وان شیایە سێ ھزار و 333 کچ و ژن و زارۆک و زەلامێن ئێزدی ژدەستێن تیرۆرستێن داعش رزگار بکەت ژوان ژی ھزار و 159 ژن بووینە و 338 زەلام یێن دی ژی ھەموو زارۆک بووینە ژ ھەر دو رەگەزان و ھێشتا ژی چارەنڤیسێ زێدەتر ژ سێ ھزار رەڤاندیێن ئێزدی دیارنینە و ب شەڤ و رۆژ بەردەوام نڤیسینگەھا رزگارکرنا رەڤاندیێن ئێزدی کاردکەت بۆ دیتن ورزگارکرنا ھەموو رەڤاندیان.
ناڤھاتی خویا کر کو ل رۆژا ئێکی ژ جینوسایدا شنگالێ پتر ژ ھزار و 500 کەسان ژ لایێ تیرۆرستێن داعش ڤە ھاتینە کوشتن ھەتا نوکە ژی 69 گۆرێن بکۆم یێن ھاتینە دیتن و دو ھزار و 700 زارۆک ل جینوسایدا شنگالێ بووینە ئێتیم.
ھەژی گۆتنێ یە ل ھەرێما کوردستانێ و عێراقی 550 ھزار کەسێن ئێزدی ھەنە و 360 ھزار ئێزدی ژ بەر تیرۆرستێن داعش ئاوارە بووینە و ھەتا نوکە ل کەمپێن ئاواران ل سنۆری پارێزگەھا دھۆکێ دژین.