پتری 165 هزار كرێكاران هاتینە دەستەبەركرن
هەولێر، قائید میرۆ:
رێڤەبەرێ گشتیێ كار و دەستەبەریا جڤاكی ل وەزارەتا كار یا حوكمەتا هەرێمێ ئاشكرا كر، پرۆسا دەسەبەركرنا كرێكاران یا بەردەوامە و هەتا نوكە زێدەتری 165 هزار كرێكاران ل سەرانسەری هەرێما كوردستانێ هاتینە دەستەبەركرن.
مەریوان بەگوك، رێڤەبەرێ گشتیێ كار و دەستەبەریا جڤاكی بۆ رۆژناما ئەڤرۆ دیاركر، ل هەموو پارێزگەه و ئیدارەیێن سەربخوە و دەڤەرداری و ناوچەداریان لیژنەیێن وەزارەتێ پشكنینێ بۆ جهێن كاری دكەن و پێدڤیە هەر كرێكارەكێ كار بكەت بهێتە دەستەبەركرن و گۆت: «ل هەرێما كوردستانێ هەژمارەكا دروست و یا فەرمی ل دۆر رێژا كرێكاران نینە، چونكی كرێكار هەیە یێ رۆژانە و هەر رۆژ ل جهەكی كار دكەت، بەلێ ئەو كرێكارێن هەتا نوكە هاتینە دەستەبەركرن، هەژمارا وان گەهشتیە زێدەتری 165 هزار كرێكاران و پرۆسا دەستەبەركرنا كرێكاران ژی یا بەردەوامە».
مەریوان بەگوك گۆتژی: «رەوشا كرێكارێن كەرتێ تایبەت ژ كرێكارێن كەرتێ گشتی باشترە، چونكی كرێكارێن كەرتێ تایبەت، مەهانە و بێی گیرۆبوون مووچەیێ خوە یان كرێیا كارێ خوە وەردگرن، بەلێ كرێكارێن كەرتێ گشتی مووچێ وان ژی وەكی یێ فەرمانبەرانە و ئاریشەیا گیرۆبوونا مووچەی كاریگەری ل سەر كرێكارێن كەرتێ گشتی كریە، مخابن ب تنێ د سالا بۆری دا زێدەتری 20 كرێكاران ل سەر كاری گیانێ خوە ژ دەست دایە و پشتی مەهەكا دی دێ ئامارێن شەش مەهێن ئێكێ یێن ئەڤ سالە ژی ئاشكرا كەین».
