پتری 30 بەربژار ل پارێزگەھا دھۆکێ ھاتینە سزادان
ئەڤرۆ نيوز:
بەرپرسێ ھۆبا راگەھاندنێ ل ئۆفیسا گشتی یا دھۆکێ یا کۆمیسۆنا ھەلبژارتن و راپرسیێ یا ھەرێما کوردستانێ بۆ ئەڤرۆ دیار کر، ل سنوورێ پارێزگەھا دھۆکێ وان پتری 30 بەربژار ب کۆژمێن جودا یێن پارەی سزاداینە.
جیھاد حەمید، بەرپرسێ ھۆبا راگەھاندنێ ل ئۆفیسا گشتی یا دھۆکێ یا کۆمیسۆنا ھەلبژارتن و راپرسیێ یا ھەرێما کوردستانێ خویا ژی کر، ھەر ژ رۆژا ھەوا ھەلبژارتنێن پەرلەمانێ کوردستانێ دەست پێکری ھەتا نوکە وان پتری 30 بەربژار ژ ئەگەرێ پێگری نەکرن ب رێنمایێن کۆمسیۆنێ و ئەنجامدانا ھەوا پێشوەخت ب کۆژمێن جودا یێن پارەی سزاداینە کو ژ ھەموو لایەنێن سیاسی نە”.
گۆتژی: “کۆمسیۆنا بلند یا ھەلبژارتن و راپرسیێ ل ھەرێما کوردستانێ ژ بەر پێگری نەکرنا وان ب قانوون و رێنما و پەیرەوێن کۆمسیۆنێ و ئەنجامدانا ھەوا پێشوەخت، بڕیارا سزادانا دارایی یا حەفت قەوارێن سیاسی یێن پشکدار د ھەلبژارتنان دا دایە”.
جیھاد خویا ژی کر، کۆمسیۆنا ھەرێمێ ھەر ئێک ژ قەوارێن سیاسی یێن پارتی دیموکراتی کوردستان و ئیکەتی نشتیمانی کوردستان ب کۆژمێ سێ ملیۆن دیناران سزا داینە، دیسا قەوارێ (بەرەڤ چاکسازیێ) کو ھەردو حزبێن یەکگرتوو ئیسلامی و بزاڤا ئیسلامی بخوەڤە دگریت ب ملیۆن دیناران سزادایە، قەوارێ پارتی گەشەپێدان ژی ب ملیۆن دیناران سزادایە، دیسا ھەردو قەوارێن پارتیا چاکسازی یا تورکمانی و جڤاتا مللی کلدانی سریانی ئاشووری ژی ب ملیۆن دیناران سزاداینە و قەوارێ حەفتێ (تاکێ ئەرمەنە) کو ب 500 ھزار دیناران ھاتیە سزادان.
