پتر ژ سێ ته‌نێن جوانكاریێن ئێكسپایه‌ر ل سالونێن دهۆكێ هاتنه گرتن
ب سه‌رڤه‌چونا كه‌رستێن جوانكاریێ مینا میكیاژ و چه‌ند كه‌لوپه‌لێن دى و بكارئینانا وان زیانه‌ك و كاره‌ساته‌كا مه‌زن ل سه‌ر ژیانا هه‌ر ژنه‌كێ په‌یدا دكه‌ت وه‌كو نوشداره‌كا تایبه‌تمه‌ندا پیستى دیار دكه‌ت. ديسا بكارئینانا كه‌رستێن جوانكاریێ یێن ده‌م ب سه‌ر ڤه چوويى زیانه‌كا مه‌زنتر ل سه‌ر پیستێ هه‌ر كه‌سه‌كێ هه‌یه ب تایبه‌ت ژنێ چونكو پیستێ وێ یێ نازكه و هه‌ر ده‌مێ ژنێ كه‌رسته‌كێ ده‌م ب سه‌ر ڤه چوويى بكار ئینا دێ بیته ئه‌گه‌ر (حه‌ساسى ل سه‌ر پیستى دروست بیت) و چه‌ند (پرسك) و (تامیسك) ل سه‌ر پیستێ وێ دروست ببن.
د. ژین ئامێدى شاره‌زایا نه‌خوشیێن پیستى و جوانكاریێ بۆ نوش نیوز دیاركر كو بكارئینانا میكیاژێ ئێكسپایه‌ر دبیته ئه‌گه‌ر پیستێ ژنێ (ره‌ش) ببیت و ب ئه‌ڤێ چه‌ندێ ڤایروس زوو ل سه‌ر لاشێ ژنێ كۆم دبن و دبنه ئه‌گه‌رێ دروستبوونا چه‌ند نه‌خوشیان و به‌كتریا دێ ل سه‌ر هه‌ر جهه‌كێ پیستى زێده بن.
ژ لایه‌كێ دیتر ڤه شوكرى شه‌فیق به‌رپرسێ پشكا په‌یوه‌ندى و راگه‌هاندنێ ل رێڤه‌به‌ریا چاڤدێریا بازرگانى بۆ نوش نیوز گۆت: به‌رده‌وام دووڤچوونا هه‌ر جهه‌كێ دكه‌ين بۆ وێ چه‌ندێ كه‌رستێن ده‌م ب سه‌ر ڤه چوويى بهێنه ژناڤبرن و ژیانا خه‌لكى بهێته پاراستن.
زێده‌تر گۆت: “ل سه‌رانسه‌رى پارێزگه‌ها دهۆكێ (3) ته‌ن و (184) كلیویێن كه‌رستێن جوانكاریێ یێن ده‌م ب سه‌ر ڤه چوويى هاتينه ژناڤبرن و ژناڤبرنا وان دێ ژیانا گه‌له‌ك ژنان ژ مه‌ترسیێ پارێزیت چونكو بكارئینانا كه‌رستێن ده‌م ب سه‌ر ڤه چوويى زیانه‌كا مه‌زن ل سه‌ر پیستێ هه‌ر كچه‌كێ دروست دكه‌ت.
دا زانين ژى كو چه‌ندین جهێن جوانكاریێ ژ لایێ وان ڤه هاتنه سزادان ب چه‌ند كوژمێن پاره‌يى چونكو وه‌ك پێدڤى و ل دوویڤ رێنمایان دبیت كار نه‌كربیت و دیسان ژى چه‌ندین كه‌لوپه‌لێن جوانكاریێ یێن ده‌م ب سه‌ر ڤه چوويى ڤه بكار دئینان، “له‌ورا دووڤچوونا مه دێ یا به‌رده‌وام بیت هەتا كو ژیانا خه‌لكێ مه یا پاراستى بیت”.