پرۆسەیا هەلبژارتنا سەرۆككۆماری نەیاسایی یە و رەت دكەین
پارتی دیموكراتی كوردستان راگەهاند، ئەو كەسێ بێی رازیبوونا زۆرینەیا هێزێن كوردی بوویە سەرۆككۆمار، وەك نوونەرێ گەلێ كوردستانێ ناهێتە هەژمارتن و دوپاتكر كر كو ئەڤ پۆستە پشكا هەموو گەلێ كوردستانێیە نەك حزبەكێ.
مەكتەبا سیاسی یا پارتی دیموكراتی كوردستان، د بەیاننامەیەكا فەرمیدا هەلوەستێ خۆ هەمبەر پرۆسەیا هەلبژارتنا سەرۆككۆماری د دجڤاتا نوونەرێن ئیراقێ دا دیار كر و راگەهاند كو پرۆسە ب «بنپێكرنا یاسا و پەیڕەوێ ناڤخۆ» برێڤە چوویە و دانپێدانێ ب شەرعییەتا بەربژارێ هەلبژارتی ناكەن.
مەكتەبا سیاسی یا پارتی ئاماژە ب وێ چەندێ كریە، كو سەرۆكایەتییا جڤاتا نوونەرێن ئیراقێ بێی كو گوه بدەتە پەیڕەوێ ناڤخۆ بەرنامەیێ كۆمبوونێ دیار كریە، ئەڤە ژی وەك «بنپێكرنەكا رۆهن یا یاسایی» وەسف كر.
هەروەسا دوپات كریە كو پۆستێ سەرۆككۆماری «ئیستیحقاقێ گەلێ كوردستانێیە نەك لایەنەكێ دیاركری»، بەلێ بەربژارێ سەركەفتی ل دەرڤەی میكانیزمێ نشتیمانیێ كوردستانێ و بتنێ ژئالیێ حزبەكێ و ب پشتەڤانییا چەند ئالیێن پێكهاتەیێن دی یێن ئیراقێ هاتییە دیاركرن.
مەكتەبا سیاسی یا پارتی دیموكراتی كوردستان د بەیاننامەیا خۆدا ب راشكاوی دبێژیت: «وێ شێوازێ هەلبژارتنێ رەت دكەین و ئەو كەسێ ب وی شێوەی هاتیە دیاركرن، وەك نوونەرێ زۆرینەیا كوردستانێ ناهەژمێرین و سەرەدەریێ دگەلدا ناكەین.»
هەمان دەم ئاماژە ب وێ چەندێ ژی كریە، كو پشتی بایكۆتكرنا كۆمبوونێ ژ ئالیێ فراكسیۆنا پارتی دیموكراتی كوردستان ڤە، پێدڤی بوو ناڤێ بەربژارێ وان ژی ژ پرۆسەیا هەلبژارتنێ هاتبا لادان.
د دوماهییا بەیاننامەیێ دا هاتیە، كو بۆ هەلسەنگاندنا رەوشێ و راوێژكرنێ ل سەر پێنگاڤێن داهاتی، پارتی بڕیار دایە هەردوو فراكسیۆنێن خۆ ل جڤاتا نوونەران و حوكمەتا فیدرالا ئیراقێ داخواز بكەتە ڤە بۆ هەرێما كوردستانێ.
