پرۆژەکێ گرنگێ پێکڤەگرێدانا دھۆک و ھەولێر راوەستیا
ئەڤرۆ نیوز:
ژ ئەگەرێ قەیرانا دارایی و ل سەر فەرمانا سەرۆکاتیا جڤاتا وەزیران، پڕۆژێ چێکرنا پرا گۆپال یا دناڤبەرا پارێزگەھێن ھەولێر و دھۆکێ دا ھاتە ڕاوەستاندن، رێڤەبەرێ کۆمپانیا ب جھئینەر ژی ئاشکرا دکەت، ھەکە پرۆژێ پرا گۆپال ب دووماھی بھێت رێیا د ناڤبەرا ھەولێر و دھۆکێ دا دێ دەمژمێرەکێ کێم بیت.
ھێرش تەیار، رێڤەبەرێ گرۆپێ کۆمپانیێن 77 بۆ رۆژناما ئەڤرۆ دیار کر کو پڕۆژێ پرا گۆپال ئێکە ژ پڕۆژێن ستراتیژی یێن ھەرێما کوردستانێ کو ل سەر رووبارێ زێیێ مەزن دھێتە ب جھئینان و گۆت: “ئەڤ پڕۆژە ھەر دو پارێزگەھێن ھەولێر و دھۆکێ دێ پێکڤە گرێدەت و ب دووماھی ھاتنا پڕۆژەی رێیا سەرەکی یا د ناڤبەرا پارێزگەھا دھۆک و ھەولێرێ دا دێ دەمژمێرەک ژێ کێم بیت”.
ناڤبری ئاشکرا کر کو پڕۆژێ پرا گۆپال ل سالا 2013ێ ھاتیە دەست پێ کرن و قووناغێن باش بڕینە و ھەتا نوکە کار تێدا یێ بەردەوامە، بەلێ ژبەر قەیرانا دارایی حوکمەتا ھەرێما کوردستانێ ئیدی نەشێت پشتەڤانیا پڕۆژەی بکەت و ل سەر فەرمانا سەرۆکایەتیا جڤاتا وەزیران ئەنجوومەنێ کۆمپانیێ بڕیار دا ل دووماھی یا ڤێ ھەیڤێ کارکرن ل سەر پڕۆژێ پرا گۆپال ب ڕاوەستینیت، چونکی پارەیەکێ زۆر بۆ ب جھئینانا پڕۆژەی پێدڤیە و کۆمپانی نەشێت بێ ھاریکاریا حوکمەتێ یا بەردەوامبیت”.
