پسپۆرەكێ وزێ یێ ئەمریكی: ئیراق خوە بریندار دكەت دا زیانێ ب ئابوورێ كوردستانێ بگەهینیت
دیبلۆماتكارەكێ بەرێ یێ ئەمریكی ل ئیراقێ و پسپۆر د وارێ وزێ دا دبێژیت، بەغدا خوە بریندار دكەت تنێ بۆ وێ چەندێ زیانێ بگەهینیتە ئابوورێ كوردستانێ، هەڤدەم پەیڤدارێ كۆمەلا پیشەسازییا پەترۆلا كوردستانێ (ئەپیكۆر) ژی دبێژیت، كۆمپانیێن ئەپیكۆر هەموو بەرهەڤی یێن كرین بۆ هنارتنا پەترۆلا هەرێما كوردستانێ،بەلێ پێدڤییە ئەو بهێنە دوورئێخستن ژ كێشەیێن سیاسی یێن د ناڤبەرا هەولێرێ و بەغدایێ دا و مافێن وان بهێنە دان.
مایكل كاكێنز، پەیڤدارێ كۆمەلا پیشەسازییا پەترۆلا كوردستانێ (ئەپیكۆر) گۆت» كارێ مە یێ بەراهیێ ئەوە هنارتنا پەترۆلا هەرێما كوردستانێ ب رێكا بۆرییا پەترۆلا ئیراق – توركیا دەستپێبكەت، بۆ دەستپێكرنا هنارتنا پەترۆلێ ژی پێدڤییە پێشوەخت مە رێككەفتنا نوو ل گەل حوكمەتا ئیراقێ و حوكمەتا هەرێما كوردستانێ هەبیت».
خویاكر ژی» مە پێدڤی ب پارەی و گرەنتیێ یا هەی، دڤێت بزانین ژ نوكە و وێڤە دێ چاوان وی پارەی وەرگرین، پێدڤییە گرەنتییەك ژ ئالیێ (سۆمۆ) و حوكمەتا هەرێما كوردستانێ بۆمە بهێتە دان».
كاكێنز ئاماژە ب وێ چەندێ كر» ژ ئەگەرێ كێشەیێن سیاسی، پارە و مووچێ خەلكێ كوردستانێ ژ ئالیێ بەغدایێ ڤە بۆ هەرێما كوردستانێ ناهێت، ئەم ژی یێن تێكهەلی وێ ناكۆكییا سیاسی بووین ، ل گەل وێ چەندێ پێدڤییە راستەوخوە پارە بۆ مە بهێتە دان، ئەم ناخوازین چاڤەڕێی هاتنا پارەیێ بەغدایێ بكەین ومە دڤێت ب رێكا فروشتنا پەترۆلێ، پارە بۆ مە بهێتە دان و د دوور بێن ژ كێشەیێن سیاسی د ناڤبەرا هەولێرێ و بەغدایێ دا».
گۆت ژی» ئەپیكۆر داخوازێ ژ حوكمەتا هەرێما كوردستانێ و حوكمەتا ئیراقێ دكەت ل سەر پرسا پەترۆلێ رێكبكەڤن».
پەیڤدارێ ئەپیكۆر ئاشكراكر ژی كو نێزیكی دو هزار كارمەند ل هەرێما كوردستانێ یێن هەین كو 80% ژ وان خەلكێ هەرێما كوردستانێ و ئیراقێ نە و گۆت» ل ئادارا 2023 مە فرۆشتنا ناڤخوەیی یا پەترۆلێ ل هەرێما كوردستانێ یا دەستپێكری بۆ وێ چەندێ مە دەستكەفتەك هەبیت، حوكمەتا هەرێما كوردستانێ ژی هەڤپشكییەك یا هەی د فرۆشتنا وێ پەترۆلێدا ب گۆڕەی رێككەفتنێن د ناڤبەرا حوكمەتا هەرێما كوردستانێ و كۆمپانیێن نێڤدەولەتی دا هەین».
ژ ئالیێ خوەڤە ڤینسنت كامپۆس، دیبلۆماتكارێ بەرێ یێ ئەمریكی ل ئیراقێ و پسپۆرێ كاروبارێن وزێ گۆت» پێدڤییە هەولێر و بەغدا چارەسەرییەكی بۆ كێشەیێن د ناڤبەرا واندا هەین ببینن، كوردستانەكا ب هێزتر و سەقامگیرتر ژ روویێ وزێ ڤە دێ ئیراقێ ژ روویێ سەقامگیری و ئابووریڤە ب هێزتر كەت».
كامپۆسی ئاماژە ب وێ چەندێ ژی كر كو ئیراقێ كاریگەری هەبوو ل سەر رێگریكرنێ ل پێشڤەچوونا ئابوورێ هەرێما كوردستانێ و وارێ وزێ و هنارتنا پەترۆلێ و گۆت» نەدانا پارەی بۆ ئەپیكۆرێ، كێشەیەكا مەزنە و وێ وێنەی نیشان ددەت كو بەغدا ناخوازیت ژ نێزیكڤە ل گەل هەولێرێ كار بكەت، ل گەل وێ چەندێ پەترۆل و وزە گەلەك د گرنگن بۆ ب هێزبوونا هەرێما كوردستانێ».
ناڤبری دیاركر ژی» هندەك ئالیێن شیعی شیرەتێن خراب ل بەغدا دكەن، ئەو پەیوەندیێن د ناڤبەرا تەهرانێ و بەغدایێ دا هەین، وەكریە هەرێما كوردستانێ وەكو گەفەكێ ل سەر بەغدا ببینن».
رۆهنكر ژی» حوكمەتا ئیراقێ یا هاریكار نینە بۆ هنارتنا پەترۆلا هەرێما كوردستانێ و بەغدا ب مەبەست بزاڤێ دكەت رێگریێ ل پێشڤەچوونا هەرێما كوردستانێ بكەت، یان ژی خوە بریندار دكەت و زیانێ دگەهینیتە خوە تنێ بۆ وێ چەندێ زیانێ ب گەهینیتە هەرێما كوردستانێ».
وی پسپۆرێ وزێ و دیبلۆماتكارێ ئەمریكی یێ بەرێ ل ئیراقێ گۆت ژی» بەغدا دخوازیت دەستهەلاتا خوە ب سەر هەولێرێ دا ب سەپینیت، ئەو ب تمامی یا لۆژیكی نینە، راگرتنا پەترۆلا هەرێما كوردستانێ مفا بۆ هیچ ئالییەكی تێدا نینە، بۆ بەغدا ئاسایی یە خەلكێ ئیراقێ د ئابوورەكێ خرابدا ب نالیت، بەلێ رێككەفتنێ ل گەل هەرێما كوردستانێ نەكەت».
ل دووماهیێ گۆت» پێدڤییە ئیدارەیا ئەمریكا رۆلەكێ مەزنتر هەبیت بۆ فشاركرنێ ل سەر محەمەد شیاع سودانی، سەرۆك وەزیرێن ئیراقێ و حوكمەتا وی بۆ بەر ب پێشڤەچوونا پەیوەندیێن بەغدا و هەولێرێ».
