پشتى به‌رزه‌بوونێ ب دو هه‌يڤان سێ گه‌نج د زيندانه‌كێ دا هاتنه ديتن
ئەڤرۆ نیوز، نەوزاد زادە ھلوری:
سێ گەنجێن دەڤەرا ئامێدی زێدەتری دو ھەیڤایە د بێ سەروشینن و پشتی لێگەریانەکا زور ئەڤرۆ ل زیندانەکا بولگاریا ھاتنە دیتن.
دڤی واری دا شڤان ھروری کو کەس و کارێ ئەوان گەنجایە بۆ ئەڤرۆ نیوز گۆت: “زێدەتری دو ھەیڤایە سێ گەنجێن گوندێ مە ب ناڤێن (ئالان محەمەد عومەر، ئازاد عومەر محەمەد، رێبەر محەمەد عومەر) بێ سەروشوون ببوون و کەسێ نەدزانی کا کیڤە چووینە، پشتی لێگەریانەکا زۆر سۆپاس بۆ خودێ ئەڤرۆ د زیندانا (خوفە) یا وەلاتێ بولگاریا دا ھاتنە دیتن”.
دەربارەی چاوانیا دیتنا وان گەنجان ناڤبری گۆت: “مە لێگەریان ل ھەموو پارێزگەھێن کوردستانێ بۆ دیتنا وان کرینە و پشتی بێ ھیڤیبوونێ د ئەنجام دا مە لێگەریانا وان ژ دەرڤەیێ ھەرێمێ دەستپێکرد ب تایبەتی پشتی وێ یەکێ کو کوچکرنا گەنجان بۆ دەرڤەیێ کوردستانێ بەر ب زێدەبوونێ ڤە چووی، مە ل وەلاتێ تورکیا دەسپێکر دووڤ دا بۆ وەلاتێ یونان و و وەلاتێن دی یێن ئۆروپا، بەلێ دیسان چو زانیاری ل سەر وان نەبوون و گومان بۆ مە دروست بوو کو د دەریا ئیجە یا تورکی دا خەندقی بن و ئەڤرۆ ب رێیا کەسەکێ کورد کو پەنابەرە ل بولگاریا دەنگ و باس گەھشتن کو ئەوی ئەو ھەر سێ گەنج یێ د زیندانا (خوڤە) دا دیتین و ھاتینە حوکمکرن بۆ دەما 3 ھەیڤان ب تومەتا بەزاندنا سنوورێن وی وەلاتی ب قاچاغی”.
ل دووماھیێ گۆت: “روژێن بھێت بۆ پشتراستبوون ژ ڤێ یەکێ دێ سەرەدانا وێ زیندانێ ھێتەکرن”.
