پشتی بورینا زێدەتر ژ چار هەیڤان دەرگەهێ لالش بۆ زیارەتێ هاتە ڤەكرن
ئەڤرۆ نیوز، بارزان مزووری:
ئەڤە زێدەتری چار هەیڤانە دەرگەهێ پەرستگەها لالش ژ سەرەدانكەرا هاتبوو گرتن د نها دا دەرگەهێ لالش بۆ زیارەتێ هاتە ڤەكرن رۆژانە ژمارەكا مەزن ل دووڤ رێنمایێن تەندروستی سەرەدانا پەرستگەهێ دكەن بۆ ئەدانكرنا رێورەسمێن خوە یێن ئایینی.
زینە عیدۆ، ئێك ژ سەرەدانكەرێن ئێزدی بۆ ئەڤرۆ نیوز گۆت: (ئەڤە زێدەتری چار هەیڤانە مە سەرەدانا پەرستگەهێ نەكریە رۆژانە چاڤەرێ بریارێن میرێ خوە بین كو بریارێ ل سەر ڤەكرنا وێ بدەت بەلێ پشتی ئەو رێكارێن نوو یێن حكومەتێ بەلاڤ كرین دوبارە مە سەرەدانا پەرستگەهێ كر).
ناڤهاتی خویاكر گەلەك زارۆكێن نوو ژدایك بووینە هەتا نها نەهات بوونە موركرن ب ئاڤا زم زم ئەو زارۆك ژی هاتنە موركرن دیسان چەندین ئەركێن ئایینی ل سەر مە بوون هەموو هاتنە ئەداكرن د پەرستگەها لالش دا .
بێكەس مەهەتی سەرەدانكەرێ ئێزدی بۆ ئەڤرۆ نیوز گۆت: (دەمێ مە سەرەدانا پەرستگەهێ كری دیمەنەك دی بوو د نها دا رێژەكا هەرە مەزن یا پەرستگەهێ هاتیە نووژەنكرن ل دووڤ شێوازێ كەڤنار سوپاسیا وان خێرخازا دكەین ئەوێن هاریكاریێن ماددی بۆ پەرستگەهێ گەهاندین بۆ نووژەنكرنا لالش).
