پشتی داعش دێ کێشێن سونا و کوردان دەسپێکەن
ئەڤرۆ:
ژ ئاریشێن ئالۆز یێن پێش کوردان، دەڤەرێن کوردستانی یێن دەرڤەی ئیدارەیا حوکمەتا ھەرێما کوردستانێ و پەیوەندیێن کوردانە ل گەل بەغدا و عەرەبێن ھەڤسنۆرێن کوردستانێ یە، مامۆستایەکێ زانستێن سیاسی ژی پێشبینیێ دکەت، پشتی ب دووماھی ھاتنا شەڕێ داعشێ، گەلەک ئاریشە دی بۆ ھەرێما کوردستانێ پەیدابن، د ھەمبەر دا، پەرلەمانتارەکێ کورد دبێژیت، سونە ھەر ب چاڤێ وی دەمێ ددەستھەلاتا بەرێ تەماشای ئاریشان دکەن و ھەلویستەکێ دژوار بەرامبەر کوردان یێ ھەی.
دکتۆر عەبدولحەکیم خسرۆ، مامۆستایێ زانستێن سیاسی ل زانکۆیا سەلاحەددین بۆ رۆژناما ئەڤرۆ گوت” باشترە ھەتا ب دووماھی ھاتنا گرۆپا تیرۆرستیا داعشێ، پەیوەندیێن د ناڤبەرا ھەرێما کوردستانێ و عیراقێ بەردەوامبن، نوکە نابێژم پەیوەندی دلاوازن، بەلێ پەیوەندیێن ھەرێمێ و بەغدا دێ مینن بۆ پشتی شەڕێ داعشێ، وی دەمی دێ ھەڤپەیمان رۆلێ خوە بینن، کو ئایا دێ سیاسەتەکێ بەرامبەر عیراقێ بکارئینن؟ ئەڤە جھێ پرسیارێ یە، پشتی داعشێ، دێ گەلەک ئاریشێن دی ھێنە پێش و دڤێت پێشبینیێن زۆر بکەین، ڤێجارێ ئاریشێن د ناڤبەرا کوردان و سونان، یان د ناڤبەرا بەغدا و ھەولێرێ ، ئەڤە ژی پرسیارەکە ھەکە ھات و داعش ب دووماھی ھات، یان ب شێوەکێ بەرچاڤ لاوازبوو، شیعە دێ چ جۆرەکێ سیاسەتێ ل عیراقێ بکارئینن؟ ئەمریکا وی دەمی دێ رۆلەکێ سەرەکی ھەبیت، ژ بەر کو ھاتنا داعشێ عیراق ب تەمامی کەفتە بن دەستێ ئەمریکا، بۆ نموونە عیراقێ ب پشتەڤانیا ئیرانێ دخواست تکریتێ کۆنتڕۆل بکەت، بەلێ نەشیا، لەوما وەسا دبینم، ئەمریکا نەشیا ب سیاسەتا خوە یا بەرێ ل گەل عیراقێ ب سەرکەڤیت ، لەوما دێ مینیت سەر سیاسەتا داھاتی یا ئەمریکا، نوکە ئیران یاریێ ب کەیفا خوە دکەت و نزانم ئەمریکا دێ رێ دەت ئەڤ رەفتارا ئیرانێ ل عیراقێ بەردەوامی ھەبیت، یان ژی دێ جۆرە سیاسەتەکێ بکارئینیت کو د بەرژەوەندیا وێ دابیت”.
عەرەفات کەرەم، ئەندامێ پەرلەمانێ عیراقێ ژ فراکسیۆنا پارتی بۆ رۆژناما ئەڤرۆ گۆت” بێگومان سنۆرێ کوردان پتر ل گەل عەرەبێن سونەیە و پشتی ئەڤ دەڤەر ب تەمامی دھێنە ئازادکرن، وی دەمی دێ ئاریشە پەیدابن و دەڤەرێن دکەڤنە د سنۆرێ مادێ ١٤٠ یێ دستوورێ عیراقێ دا، چونکو سونە خوەدی عەقلیەتەکا کەڤنن و ناھێنە سەر چو رێیان و ھەر ب چاڤێ سەردەمێ دەستھەلات ھەی بەرێ خوە ددەن ھەموو پرسان، چو گۆھۆڕین ب سەر عەقلێ عەرەبێن سونەدا نەھاتیە، تنێ ئێک نەبیت، ئەوژی سونە دبێژن نوکە پتر دلێ وان ب کوردان خوەشترە ژ عەرەبێن شیعە، ب تایبەتی پشتی چوونا ئاوارێن باژێرێ رەمادی بۆ بەغدا، پەرلەمانتارێن سونە گازندە ھەبوون و دگۆتن دەمێ ئەم دچینە ھەرێمێ پشتی ھنگی داخوازا کەفیلەکی دکەن، بەلێ ھێشتا ئەم نەھاتینە بەغدا شیعە یێ داخوازا کەفیلان بۆ عەرەبێن سونە دکەن، ب کورتی سونە ناھێنە چو رێیان و دێ ئاریشێن پشتی داعش گەلەک بن”.
عەرەفاتی گۆت ژی” ھەلویستێ عەرەبان یێ توندە ل سەر دەڤەرێن دەرڤەی ئیدارەیا حوکمەتا ھەرێما کوردستانێ، بەلێ یا دلێ مە خوەش دکەت ئەوە، ھەیبەتا داعشێ ل سەر دەستێ کوردان ھاتە شکاندن و ئەو جھێن کوردان کۆنتڕۆل کرین، ناھێتە بەردان و بوویە ئەمرێ واقع، ھەر دەڤەرەکا دەرڤەی ئیدارا ھەرێمێ ھاتبیتە ئازادکرن بۆ مەیە و جارەکادی ناھێتە چۆلکرن ، ئاریشەکا دی یا پشتی شەڕێ داعشێ ھەبوونا میلیشیاتێن شیعەیە ل دەڤەرێ، مە وەکی پارتی و وەکی پەرلەمانتار ژی مەترسیا ڤان ھێزا خۆیاکریە و ل ڤێ دووماھیێ ژی ل کەرکووکێ و ھندەک دەڤەرێن دی دیاربوو وان چو نیەت ھەیە و ل بەرە چو بکەن، بەلێ نوکە سەرکردایەتیا کوردی ئێک ھەلویستە ل ھەمبەر میلیشیاتێن شیعە و حەشد شەعبی”.
